Sekretáriu Estadu Formasaun Profesionál no Empregu (SEFOPE), Julião da Silva. Imajen/Egas Cristovão.

DILI,(TATOLI) – Kandidatu traballadór hosi munisípiu Dili, ohin tuir ona teste liuhosi diresaun Sekretariu Estadu ba Formasaun Profisionál no Empregu (SEFOPE) liuhosi programa servisu temporáriu ka seasonal worker programme (SWP) hodi ba servisu iha Austrália durante fulan neen.

“Semana kotuk ita hahú Atauru, parte ida hosi Dili, maibé ita halo tratamentu espesiál illa ida  no ohin hahú iha munisípiu Dili hala’o iha Bekora”, dehan Sekretáriu Estadu, Julião da Silva, ba jornalista iha Palásiu Governu, ohin.

Teste ne’e atu identifika kapasidade lian no fíziku  hosi traballadór atu bele servisu iha Austrália tuir nesesidade kompañia.

Maibé Governante la esplika detalla totál kandidatu hira hosi munisipiu Dili maka tuir teste ne’e.

Ba munisipiu 12 inklui Rejiaun Administrativa Espesiál Oekusi-Ambenu (RAEOA), Governante afirma fó ona teste, tanba ne’e falta de’it munisípiu Dili.

Nia espera tempu badak sei asina akordu ho Governu Austrália kona-ba  Pacific Labour Scheme hodi haruka timoroan ba servisu iha Austrália ho durasaun tinan tolu.

“Ita hein de’it ona hosi Governu Austrália, tanba ita nia Governu haree ona ezbosu akordu ne’e no hein governu Austrália haruka mai ita bele asina ona”, dehan tan.

Bainhira parte rua asina ona nota entendimentu ne’e, parte SEFOPE sei halo rekrutamentu ba kandidatu traballadór sira  hodi  ba servisu.

Entretantu, ohin SEFOPE mós fó teste ba kandidatu traballadór ne’ebé atu ba servisu iha Korea iha Jináziu Dili.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here