Lider konviksaun relijiozu aprezenta sira nia preokupasaun ba konteudu negativa iha MedSos liu husi semináriu no worskhop rejionál iha Otél Ayodya, Nusa Dua, Bali, Segunda (18/3/2019). Imajen/Francisco Simões

BALI, (TATOLI)—Konviksaun relijiozu iha Indonézia tau sira atensaun no preokupasaun ba konteúdu negativu ne’ebé espalla maka’as iha media sosiál (MedSos), ikus-ikus ne’e.

Liu husi semináriu no workshop rejionál ho tema ““The Nexus between Freedom of Religion or Belief and Freedom of Expression in Southeast Asia”, ba loron dahuluk nian no sesaun daruak nian, ohin, ne’ebé hala’o iha salaun Otel Ayodya, Nusa Dua, Bali, Indonézia, reprezentante lideransa konviksaun relijiozu sira preokupa konteúdu negativu iha media sosiál, hanesan Facebook, Twitter, WhatsApp, YouTube,  no mós sítiu  online balun ne’ebé publika diskursu ódiu ligadu ho toleránsia no armonizasaun konviksaun relijiozu nian.

Oradór sira husi konviksaun relijioza ba semináriu internasionál ne’e, kompostu husi Sekretariu Jeral Nadhatul Ulama (NU), K.H. Yahya Cholil Staquf, Bhikkhu husi Vihara Mendut Magelan, Bhikkhu Santacitto, ho Pdt. Krise Gosal husi Komunidade Igreja Indonézia, husu ba entidade hothotu, liuliu ukun na’in sira no ho apoiu media komunikasaun sosiál (media tradisionál) hotu, atu tulun malu kombate lalais konteúdu negativu iha media sosiál tanba bele estraga karater sosiedade nian, liuliu juventude sira nian, no bele fó ameasa ba estabilidade no unidade nasionál.

Lideransa konviksaun relijiozu hirak ne’e fó sasin katak, armonizasaun moris loroloron  povu sira nian, liuliu toleránsia relijioza nian forte tebes iha nasaun sira Sudeste Aziátiku, tanba ne’e, mak hothotu tenke tau iha neon atu kuidadu no fortaleza unidade ida ne’e.

Bhikkhu  Santacitto ho Pdt.Krise Gosal, mós tau kestaun no preokupasaun ba media tradisionál sira iha rejiaun Sudeste Aziátiku, liuliu Indonézia, ne’ebé ladún iha kolaborasaun di’ak   atu tulun malu promove atividade relijiaun minoridade sira. Maske nune’e, oradór na’in rua ne’e aprofunda katak, ksolok tebes ba  sosiedade Indonézia tanba iha relijiaun oioin no barbarak maibé kuda nafatin toleránsia relijiozu hodi komunga filozofia Pancasila.

Oportunidade ne’e, partisipante iha semináriu no workshop rejionál ne’e balun mós aprezenta sira nia preokupasaun kona-ba  kazu Basuki Tjahaja Purnama “Ahok”, eis Governador Jakarta, ne’ebé tenke simu penalidade tama prizaun tanba de’it diferente relijiaun ho maioria Musulmanu iha Indonézia.

Hatán ba kestaun ne’e, K.H Yahya Cholil Staquf, hateten, kazu Ahok nian la iha relasaun ho relijiaun, maibé iha tendénsia polítika maka’as. “Ita haree komunidade Islam ou Musulmanu barak mak sai apoiante ba Ahok no barak husi organizasaun Islam nian mós fó apoiu Ahok iha prosesu ne’e. Hau bele garante ba imi katak, Ahok nia kazu ne’e iha motivu polítika la’ós relijiaun”, afirma K.H. Yahya Cholil Staquf.

Semináriu no workshop rejionál ho tópiku “Relijiaun ho Media” ne’e, K.H. Yahya Cholil Staquf, informa mós katak, bainhira nia reprezenta  NU ba tuir colloquia ida iha rai balun hodi ko’alia kona-ba  issue Musulmanu nian kontra terrorizmu ho estremizmu, identifika grupu terrorizmu no estremizmu mós iha sira nia rede sosiál kuaze millaun 3.3 no sítiu online kuaze millaun 1.8, hodi publika de’it sira nia material funu, halo diskursu ódiu, no promove doutrina radikalizmu nian.

“Ita iha responsabilidade ba moris armonizasaun iha povu nia leet no ita mós tenke iha ajenda polítika ne’ebé kontinua asegura unidade no estabilidade”, hateten K.H Yahya.

Lideransa sira konviksaun relijiozu nian mós  preokupa ho informasaun falsas  (fake news) ou hoax  ne’ebé mak ikus-ikus ne’e provoka estabilidade no unidade nasionál, iha nasaun hotu iha mundu rai klaran, inklui nasaun sira iha Sudeste Aziátiku.

“Maluk sira media tradisionál mós iha responsabilidade étika no moral atu ita hotu hamutuk kombate hoax, fake news no publikasaun sira ne’ebé la fó benefísiu ba ita nia unidade no armonizasaun”, hateten K.H Yahya.

Iha sesaun antes, antigu Reitór Universidade Udayana, Anak Agung  Gde Muninjaya, aprezenta mós perspetiva moris Balinese sira nian ligadu ho filozofia espirituál sarani Hindu sira nian. Nia dehan, hanesan sarani Hindu tenke moris iha dame no hadomi pás.

“Paz no hadomi malu sai ona lisan ida ne’ebé forte tebes iha ami nia doutrina moris fiar nian. Tenke hadomi pás, hadomi malu no hadomi ai-horis ho balada sira”, hateten Anak Agung Gde Muninjaya.

Ba media no jornalista sira, lider konviksaun relijiozu hirak ne’e rekomenda atu kontinua hala’o knar jornalizmu nian no presiza tebes mós media tenke lori dame no media mós presiza kria dame.

EKIPA

HAKEREK NO HATÁN

Please enter your comment!
Please enter your name here