Uma Fukun Parlamentu Nasionál. Imajen/Espesiál

DILI, (TATOLI) – Parlamentu Nasionál (PN) liuhosi sesaun plenária segunda ne’e halo votasaun hodi rejeita pedidu interpelasaun husi Bankada Opozisaun Frente Revolusionária Timor-Leste Independente (FRETILIN) ho rezultadu votasaun a favór 29, kontra 0 no abstensaun 0.

Iha semana hirak liubá, Bankada FRETILIN hatama pedidu interpelasaun ba Governu kona-ba planu negósiu partisipasaun projetu Greater Sunrise milliaun $650 nomós selebrasaun kontratu ho kompañia Sacom (kompañia ne’ebé durante ne’e fornese kombustivel ba sentrál eletrika Betanu).

Maske partisipa iha sesaun plenária, deputadu husi bankada opozisaun sira hanesan FRETILIN, Partidu Demokrátiku no Partidu Unidade Dezenvolvimentu Demokratiku (PUDD) la partisipa iha votasaun ne’e ho razaun interpelasaun ne’e direitu deputadu nian.

“Direitu deputadu la’ós buat ne’ebé ita atu halo votasaun uza maioria, atu dehan bele ou labele, a não ser que ita altera lei kona-ba estatutu deputadu ninian. Se deputadu ida laiha direitu atu halo interpelasaun, entaun rai ida ne’e la’ós demokrasia ona no konstituisaun ita altera hotu”, intervensaun Xefe Bankada FRETILIN, Aniceto Guterres.

Aniceto argumenta deputadu ida ezerse nia funsaun iha Parlamentu atu atu halo interpelasaun no pergunta ba Governu iha PN, nune’e mós iha negósiu no  investimentu hotu tenke iha planu.

“Asuntu ida ami koloka ne’e espesífiku kona-ba planu negósiu, la’ós kampaña politika iha fatin-fatin ne’ebé ko’alia ona. Ami husu planu negósiu, tanba agora komesa hasai ona osan atu halo investimentu iha atividade petrolífera, atu hetan retornu finanseiru ne’e não me digas  hasai ona osan atu ba rai de’it”, katak.

Deputadu Bankada CNRT, Partrocínio Fernandes dos Reis, admite iha reuniaun lider bankada semana kotuk Bankada FRETILIN aprezenta rekerimentu rua atu halo interpelasaun ho Governu, maibé rekerimentu ida liu ona nia prazu, iha loron 10 nia laran tuir rejimentu hateten.

“Diskusaun ne’e diskute duni uituan hafoin deskobre ninia lapsu no haree rejimentu la fó dalan, entaun ami deside ajenda ne’e la presiza diskute no diskute seluk kona-ba atu halo interpelasaun ho Ministru Obras Públikas, maibé mós tenke hadi’a kontiúdu ho subtánsia husi rekerimentu ne’e, tanba kontiúdu mak selebrasaun kontratu ba kompañia ida ne’ebé ita la deteta fallansu iha ne’ebé”, katak.

Deputadu Bankada PD, Adriano do Nascimento, hateten nu’udar opozisaun apoiu rekerimentu husi Bankada FRETILIN.

“Ne’e direitu bankada nian, direitu deputadu nian, liu-liu direitu opozisaun atu halo check and balance. Tuir ami nia perspetiva katak deputadu sira labele dehan lae tanba bankada opozisaun atu husu ba Governu hodi esplika”, katak.

Deputadu Bankada Kmanek Haburas Unidade Nasional Timor-Oan (KHUNTO), António Maria Nobre Amaral Tilman, hateten bankada respeitu no konsidera deputadu rekerente sira maibé deside fó Timor Gap halo servisu, enkuantu rekerimentu selebrasaun kontratu ba kompañia ida de’it bankada foun ne’e konsidera la relevante.

Xefe Bankada PUDD, Antonio de Sá Benevides, hateten ba interpelasaun ho Ministériu Obras Públikas (MOP), husu atu hadi’a pedidu ne’e la’ós ba kontratu nian maibé loke mós asuntu seluk atu ministériu marka prezensa esplika, enkuantu ba Timor Gap fó espasu atu kumpre servisu pagamentu ba ConocoPhillips no Shell, hafoin bele konsidera atu diskute tuir mai.

Jornalista: Julia Chatarina

Editora: Rita Almeida

Notisia relevante: http://www.tatoli.tl/2019/03/bankada-amp-la-konkorda-ajenda-rekerimentu-interpelasaun-hosi-fretilin/

HAKEREK NO HATÁN

Please enter your comment!
Please enter your name here