Foto/Google.

DILI, (TATOLI) – Autoridade Aduaneira (AA) ka Alfándega daudaun ne’e halo negosiasaun ho Banku Nasionál Komérsiu Timor-Leste (BNCTL, sigla iha portugés) para loke nia balkaun ida iha Aeroportu Nicolau Lobato Dili ou tau banku movel ida para fasilita ema halo pagamentu.

Diretór Jerál Autoridade Aduaneira (AA), José António Fátima Abílio, hatete bainhira BNCTL aseita ona protokolu ne’ebé maka AA haruka ba sira, kuandu sira foti desizaun hodi konkorda ona maka bele fasilita ona pagamentu.

“Prinsípiu iha negosiasaun ami ko’alia ona ho BNCTL, sira dehan prontu tanba sira iha mobile bank ne’e, la’ós dehan full time sira bá iha aeroportu, maibé oras ida ne’ebé aviaun to’o ne’e maka foin sira bá halo atendimentu depois aviaun fila sasán saida maka prosesa hotu sira bele fila ona”, José Abílio dehan iha edifísiu tuan Ministériu Finansa área Palásiu Governu, ohin

Alternativa seluk kuandu permite BNCTL bele loke sira-nia balkaun ida iha aeroportu para fó atendimentu depois bele regula oras tuir aviaun nian, tanba karik iha pasajeiru ruma mai presiza atu troka sira-nia osan tenke iha banku ida ne’ebá para fasilita.

“Ida ne’e maka ami halo esforsu para BNCTL bele konklui lalais tiha akordu ida ne’e”.

Diretór Alfándega Aeroportu Dili, Armindo dos Santos, husu atu estabelese banku iha iha aeroportu, nune’e sasán sira ne’ebé maka halo ona inspesaun atu selu ne’e, selu kedan iha aeroportu.

“Tanba banku nia serbisu to’o de’it tuku tolu taka, ami iha ne’e tuku tolu aviaun foin tama entaun dalaruma sasán sira ne’ebé sai urjente ne’ebé presiza ita atu fasilita ita difikulta ho serbisu sira liuliu ba pagamentu”.

Armindo dehan tanba ho mudansa governasaun ne’ebé iha, posivel komérsiu ne’ebé liuhusi aeroportu sei sa’e beibeik, entaun sira sei fasilita fatin ba banku hodi nune’e ema bele selu taxa ne’ebé liuhusi aeroportu.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here