Prezidente KI, Virgílio Guterres, ho Diretór Programa Institutu LANDI (PT. Ivory International), Smith Muthoka Ndila, iha Bali, Sábadu (16/3/2019), asina akordu kooperasaun. Imagen/Francisco Simoes

BALI, (TATOLI)—Funsionáriu Konsellu Imprensa (KI) hamutuk na’in ualu (8) sei tuir formasaun jestaun lideransa iha Institutu LANDI, Bali, Indonézia.

Bazeia ba planu no programa kapasitasaun rekursu umanus ne’e, ohin, iha Bali, Prezidente KI, Virgílio da Silva Guterres, asina ona akordu kooperasaun ho Diretór Programa Institutu LANDI (PT. Ivory International), Smith Muthoka Ndila, atu bele aselera fasilita formasaun ba funsionáriu KI nian ne’ebé tuir planu sei  hala’o durante loron lima (5), hahú husi loron 13 to’o loron 17 fulan Maiu tinan 2019.

Akordu kooperasaun ne’e nia durasaun fulan tolu (3), komesa husi loron 16 fulan Marsu to’o loron 16 fulan Maiu tinan 2019  no iha fleksibilidade bele prolonga ou renova depende ba nesesidade Konsellu Imprensa (KI) nian.

“Akordu  ne’e iha relasaun ho programa dezenvolvimentu institusionál no rekursu umanus hodi haruka KI nia funsionáriu tuir formasaun iha Institutu LANDI ne’ebé fokus liu ba area prioridade jestaun lideransa no jestaun institusionál”, hateten Prezidente KI, Virgílio Guterres.

Iha akordu ne’e, KI sei selu kustu treinamentu nian ba Institutu LANDI ho valor US$7,150.00 ho mós responsabiliza hela fatin ba funsionáriu na’in ualu ne’ebé atu tuir formasaun, inklui selu taxa 10% ho valor osan US$650,00.

Responsabilidade husi parte Institutu LANDI nian mak oinsá prepara fatin kursu ho seguru no saudavel ba partisipante sira no mós prepara fasilidade treinamentu nian ho eskala modernu no treinadór sira ne’ebé iha duni peritu ba area formasaun jestaun no lideransa nian.

Institutu LANDI nudár institutu formadór  nivel internasionál estabelese tinan 10 liu ba ho kualifikasaun internasionál iha area jestaun institusionál, jestaun lideransa no administrasaun institusionál.

Durante ne’e LANDI mós hetan fiar husi Governu Timor-Leste hodi fó formasaun ba funsionáriu husi instituisaun oioin, mak hanesan funsionáriu husi Ministériu Negósiu Estranjeiru no Kooperasaun (MNEK), Palásiu Prezidente Timor-Leste  (Gabinete Casa Sivíl), Comissão da Função Publico (CFP), FDCH (Fundo de Desenvolvimento  do Capital Humano), APORTIL (Autoridade de Prontuário de Timor-Leste), no mós iha fulan Abril ne’e nia laran Autoridade Municipal Dili sei haruka mós nia funsionáriu sira tuir formasaun jestaun lideransa iha institutu refere.

Iha nivel internasionál nian, Institutu LANDI fó ona mós formasaun jestaun institusionál no jestaun lideransa ba partisipante sira husi Malázia, Singapura, Kenya, Tanzania ho nia fatin formasaun iha rai li’ur no  mós iha Indonézia laran.

EKIPA

HAKEREK NO HATÁN

Please enter your comment!
Please enter your name here