Ekipa Kriativu XGRR hala’o hela atividade kuda ai-oan iha Dolok-oan, Kristu Rei, Dili. Imajen Ajénsia Tatoli/Xisto Freitas

DILI (TATOLI)—Ekipa Kriativu Xanana Gusmão Reading Room (XGRR),  Sesta loraik (15/3/2019), kuda ai-oan iha área Dolok-oan, Fatukama, Postu Administrativu Kristu Rei, Munisipiu Dili.

Ekipa Kriativu XGRR  kompostu husi estudante sira nivel sekundáriu no ensinu superiór, ne’ebé durante ne’e tuir formasaun gratuita iha área oi-oin hanesan office administration & finance, data base, public speaking no selu-seluk tan iha XGRR.

Membru Board Xanana Gusmão Reading Room, Ilídio da Costa Ximenes, ba TATOLI hateten katak, objetivu husi kuda ai-oan ne’e atu halo reflorestasaun hodi evita rai monu. Tanba tuir nia hanoin, ai-horis maka bele prodús bee no mós halo protesaun ba rai la bele monu.

Iha fatin hanesan, Jestór Xanana Reading Room, Gaspar Quintino Freitas, aprofunda liu tan katak,  kuda ai-oan ne’e hanesan pasu inísiu ida ne’ebé mai husi rezultadu diskusaun entre estudante sira ne’ebé hamahon an iha XGRR.

Nia garante katak,  ai-oan sira ne’ebé kuda ona iha fatin refere sei tau matan husi Ekipa Kriativu Xanana Gusmão Reading Room.

Antes kuda ai-oan iha fatin ne’ebá, Ekipa Kriativu XGRR husu lisensa ba Diresaun Nasionál Floresta no  ai-oan samtuku ho mahoni hamutuk hun 600-resin mak  ekipa kriativu XGRR   kuda iha area refere.

Jornalista: Xisto Freitas

Editór: Francisco Simões

 

 

HAKEREK NO HATÁN

Please enter your comment!
Please enter your name here