Primeiru Ministru, Taur Matan Ruak. Imajen/Antonio Goncalves

DILI, (TATOLI) – Primeiru-Ministru, Taur Matan Ruak, husu ba servidór Estadu atu akompaña mudansa ne’ebé governu planeia.

“Ha’u hakarak ita-boot sira (funsionáriu públiku sira), akompaña mudansa ne’e. Ha’u apela timoroan sira ne’ebé matenek iha administrasaun no jestaun, ita-boot sira ne’ebé serbisu iha administrasaun no jestaun, direitu administrativu ajuda dezeñu sistema ida ba Timór. Ha’u la hateten dehan aat hotu”, hateten Xefe Governu bainhira abertura ofisiál komemorasaun loron nasionál Funsaun Públika ba da-15 iha Edifísiu Ministériu Finansa (MF), Ai-tarak laran, sesta (15/3).

“Ha’u hakarak ida klaru. Oinsá? Sé mak komanda? Sé mak fiskaliza? Sé mak halo punisaun? Ne’e iha direitu administrativu báziku; diresaun, komandu no kontrolu funsaun saida? fó estabilidade ba dezenvolvimentu institusionál, fó sentidu ba diresaun; efisiénsia, kontrolu. Tanba ne’e ha’u hakarak ita halo korresaun ba ita-nia sistema”, reforsa tan.

Ezekutivu ne’e friza tan buat ida implementa sistema, ne’e ida. Buat seluk ida mak halo korresaun ba ita-nia aan; ida ne’ebé di’ak ita kaer, ida ne’ebé la di’ak ita hasai. La di’ak ita hadi’a.

“Tanba ne’e, tempu ba tempu ita hadi’a aan, orienta, ajusta ezatamente ida ne’e. Ne’e mak ema dehan sira ne’ebé sobrevive la’ós sira ne’ebé boot, sira ne’ebé riku ou sira ne’ebé kiak, mas sira ne’ebé hatene adapta aan ba iha evolusaun konstante dezenvolvimentu tanba ita iha funsaun atu jere funsaun administrasaun públika, funsaun ne’ebé serbí ita-nia sidadaun uza rekursu Estadu nian hothotu atu benefisia ita-nia sidadaun”.

Primeiru-Ministru haklaken sistema administrasaun sira hothotu ohin loron komesa orienta sira-nia aan uza prinsípiu efisiénsia, efikásia; esforsu ki’ik, rekursu ki’ik maibé rezultadu boot.

“Ita-nia gastu, ita halo balansu entre reseita ho despeza; prinsípiu ida ne’e ema soe ona. Ema haree fali kona-ba rezultadu; O gasto para que serve? Se rezultadu la iha gasta ba halo saida? Ita-boot sira haree, ita-nia mákina estadu ne’e todan, pezu boot liu ba ita-nia estadu rasik”.

Tanba ne’e, lider timoroan ne’e aprezenta mós dadus balun relasiona ho gastu sira perante funsionáriu públiku sira katak: “Ha’u lori dadus balun iha ne’e, ha’u fó ita-boot sira para iha ideia. Gasta ba transporte; kareta, manutensaun kareta, mina aluga kareta. 2014, quarenta sete mil, 2015, quarenta cinco milhões, 2016, vinte oito milhoes, 2017, vinte dois milhões. Ha’u husu ona 2018 inklui oitavu governu nian para haree no ajusta para labele ita taka-matan atu fila fali”.

“Ha’u uluk krítika maka’as (…). Viajen nasionál no estranjeiru de’it, 2014, vinte trés milhões, 2015, vinte seis milhões, 2016, vinte trés milhões, 2017, dezasete milhões. Ita-boot sira haree viajen ho kareta, furak!? Ita kompara ita-nia eskola sira, ita ba iha foho, klínika sira, administradór postu ninia sekretáriu, administradór munisípiu sira, prezidente munisípiu sira, ita dehan ba sira osan la iha, mas enkuantu ita gasta esbanja. Ha’u krítika ha’u-nia aan”,  salienta ezekutivu ne’e.

Taur Matan Ruak hateten: “Ha’u fó mensajen ba ministru sira, liliu ba Ministériu Finansa ne’ebé kaer osan no aloka osan atensaun, atu ba ne’ebé? Ita-nia povu sei la admite ida ne’e. Ha’u ko’alia ho conhecimento da causa, sentimento de revolta no vontade. Tanba ne’e, ha’u husu ita-boot sira-nia tulun. Naturalmente sei halo sakrifísiu, mas nesesáriu porque se la halo agora, halo aban, nia presu sei boot liu”.

Jerasaun Tuan Hotu Dadaun

Eis-guerilleiru ne’e akresenta jerasaun tuan sira ne’ebé lidera jerasaun foun agora hotu dadaun, tanba ne’e lider tuan sira ne’ebé agora sei iha halo sakrifísiu atu hadi’a problema sira liga ho nesesidade moris povu nian, interese Estadu no nasaun, se lae, tuir PM katak sei difísil liu ba jerasaun foun sira tanba  ‘tau tiha bikan laran hasai fali’, ne’e problema.

Tanba saida? Tanba nasaun hotu iha mundu luta ba sira-nia sobrevivénsia, sira-nia dezenvolvimentu i kompete malu, hadau malu, hetan rekursu para sustenta sira-nia moris. Konflitu iha mundu nia objetivu mak ida ne’e.

Tanba ne’e mak ema dehan interese ne’e permanente. Interese de busca rekursu para sustenta dezenvolvimentu no sobrevivénsia hanesan nasaun no povu ne’e permanente.

Piór liu kada tinan ba tinan ne’e nia escasse ne’e diminui bebeik. Tanba ne’e, oportunidade di’ak. Tanba saida? Tanba faze ida dezenvolvimentu, konstrusaun institusionál ou estadu implika/signifika dezenvolvimentu institusionál estadu no dezenvolvimentu ekonómiku, ita iha Planu Estratéjiku Dezenvolvimentu Nasionál (PEDN), programa ba tinan lima kada nasaun, Planu Asaun Anuál para ita halo dezenvolvimentu; ita-nia infrastrutura, dezenvolvimentu rekursu umanu no área dezenvolvimentu sira seluk, ita sei ba iha faze, prosesu seluk, konstrusaun nasaun.

Konstrusaun nasaun, iha nasaun barak halo revolusaun ida ne’e; funsaun progresivu. Ita-nian ne’e la’ós progresivu tanba teste boot ne’e iha prezensa koloniál sira ita hatudu, ita la’ós omojéneu; ita eterojéneu; povu multi-étniku, multi-kulturál I multi-linguístiku.

“Nasaun sira ne’ebé omojéneu ninia risku ba ninia sobresaltu ne’e menus mas nasaun sira hanesan ita nian; multi-étniku, multi-linguístiku, multi-kulturál ne’e ita presiza halo ezersísiu tanba ba fali faze seguinte, faze konstrusaun ba nasaun ne’e iha buat rua ne’ebé mak ita tenke tau atensaun,” eis-guerilleiru ne’e fó hanoin.

Timoroan Tenke Iha Sentimentu Perténsia

Lider timoroan, Taur Matan Ruak, sujere nu’udar timoroan no servidór públiku, ita tenke iha sentimentu perténsia ba ita-nia rain, ita-nia estadu, iha situasaun no kondisaun saida de’it.

PM Taur Matan Ruak reforsa bainhira timoroan ida sei iha sentimentu injustia, konstrusaun nasaun sei sai problema tanba nia sente katak marjinalizadu, afastadu.

“Tanba ne’e ha’u ohin temi, ba oportunidade ida ne’e bele espresa ha’u-nia sentimentu no husu liliu ita-boot sira ita serbisu hamutuk hadi’a ita-nia sistema administrasaun. Ita iha apoiu internasionál maibé importante liu katak sentimentu pertensa. Juntar os melhores cabeças (halibur hanoin di’ak sira hotu-red) timoroan sira hodi estabelese, dezeña sistema adaptavel ba ita-nia realidade, e que ita responsabiliza, ita halo buat foun, ita adapta, operasionaliza hodi ajuda ita ba oin”.

Ezekutivu esplika ita tenke dezeña rasik ita-nia sistema no apar ho ita-nia realidade. “Ita sira ne’e mak na’in ba ita nian i ha’u fiar katak iha pasu primeiru ita hateten ita bele, konfia ita-nia aan. Husik ema seluk ko’alia katak ita beik mas ita nunka hatudu ba sira katak ita beik. Ita matenek tanba ne’e mak nasaun ne’e iha”.

Hodi reforsa: “Ita aseita idea hotu mas ita mós halo com que ita prevalese ita-nia opiniaun kona-ba ita-nia rain ba ne’ebé? La’o oinsá? Lais hanesan ne’ebé? Atualmente ita iha responsabilidade boot. Agradese imi-nia kontribuisaun, liuliu sira ne’ebé hahú kuandu administrasaun hahú harii”.

Eis-prezidente repúblika ne’e realsa ita tenke hakru’uk ba ita-nia eroi sira, lider timoroan jerasaun tuan sira, eis-veteranu no kombatente ba libertasaun nasionál sira tanba sira mak pioneiru ba independénsia Timór nian no istória rejista tiha ona.

Eis-xefe estadu ne’e relembra, durante luta rezisténsia ba independénsia Timor-Leste nian, jerasaun tuan sira nunka imajina loron ida bele hola parte tan iha prosesu konstrusaun estadu no nasaun hamutuk ho jerasaun foun sira maibé realidade hatudu seluk katak bele hola parte iha ámbitu ida ne’e.

“Entaun ne’e onra, priviléjiu boot ba ami, halo parte ida ne’ebé uluk batalla ba ukun aan também halo parte iha imi ne’ebé luta ba moris di’ak. Se uluk hahú ho sira ne’ebé la hatene lee no hakerek ita manan nasaun ida boot hanesan Indonézia, ho imi ita la manan, buat ruma laloos”.

“Karik, laloos iha buat ida de’it, uluk ne’e mak ‘virus’ hotu ona. Ha’u fo fiar ba ita-boot sira, ita serbisu hamutuk, Komisaun Funsaun Públiku iha nia apoiu tomak, iha tempu badak sei ko’alia ho Prezidente Funsaun Públika, Diretór Nasionál sira, saida mak presiza hadi’a, inklui ita-nia timoroan sira matenek ne’ebé iha, diskute, fó hanoin ba malu, saida mak di’ak, ajusta”,  Primeiru-ministru konklui.

Komemorasaun loron nasionál funsaun públika ba dala-15 iha tinan ida ne’e komisaun organizadora ma Ministériu Justisa (MJ). Komemorasaun ne’e realiza, husik mós bulaun no pombu nu’udar símbolu paz nian.

Atividade ne’e hetan partisipasaun másimu husi funsionáriu públiku sira inklui diretór nasionál no munisípiu sira. Nune’e mós iha loron nasionál funsaun públika ne’e realiza mós atividade kuda ai-oan tuir fatin sira ne’ebé mak identifikadu ona husi Komisaun Organizadora.

Jornalist: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here