Ministru Transporte no Komunikasaun, José Agostinho da Silva. Imajen/ António Gonçalves

DILI, (TATOLI) – Ministru Transporte no Komunikasaun, José Agostinho da Silva, hateten governu sei buka solusaun hodi rezolve movimentu transporte aériu, inklui presu billete Dili-Denpasar ne’ebé ikus mai aas.

“Primeiru-Ministru fó orientasaun ba ha’u nu’udar Ministru Transporte no Komunikasaun iha tempu badak sei desloka ba Malázia hodi buka solusaun hodi normaliza movimentu transporte aériu”, tenik nia ba jornalista sira hafoin hasoru malu ho Xefe Governu iha Palásiu Governu, ohin.

Hodi hatutan: “Ita hotu hatene agora dadauk folin tiket agora aas ba bebeik, nune’e fó todan ba ita nia ema sira ne’ebé mak halo viajen”.

Maske nune’e, governante ne’e rekoñese iha ona proposta husi parte balun hodi kompete iha indústria transporte aériu.

“Iha parseiru barak mak interese maibé ita haree no estuda dokumentu sira atu oinsá bele hatúr desizaun ne’ebé mak di’ak”, katak.

Nia dehan tan governu hanoin hela oinsá iha alternativu kompañia aériu ida rasik.

“VIII Governu Konstitusionál liuhosi Ministériu Transporte no Komunikasaun kompromitidu oinsá bele eselera prosesu sira hanesan dezenvolvimentu infraestrutura liga ho transporte aériu ninian, hafoin tenke hahú haree oinsá atu iha kompañia aériu rasik”, tenik tan.

Entretantu ha loron 21 janeiru, Ministru Transporte no Komunikasaun, José Agustinho da Silva, no Ministru Transporte Repúblika Indonézia, Budi Karya Sumadi, asina ona nota entendimentu iha área transporte aéreu ho objetivu hasa’e kualidade kompañia aéreu nasaun rua, iha Jakarta (Indonézia).

Iha Aéroportu Nicolau Lobato, bainhira foin to’o husi viajen, Ministru José Agostinho esplika nota entendimentu ne’e rasik kona-ba frekuénsia semo ne’ebé hasa’e husi 14 ba 28, nune’e loke dalan ba kompañiia aériu seluk atu kompete iha merkadu.

Durante ne’e, operadór transporte aériu tolu hanesan Sriwijaya, Nam Air no Citilink mak halo hela operasaun husi Dili-Denpasar.

Antes ne’e operadór tolu ne’e aforesse presu billete entre $70-$90 ba vó ida, maibé ikus mai servisu tolu ne’e akumula ba jerente ida de’it, entaun laiha kompetisaun iha merkadu, tanba ne’e agora dadauk presu ba vó ida entre $190-$220.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here