Ministra Finansa en ezersísiu, Sara Lobo Brites. Imajen Egas Cristovão

DILI, (TATOLI) – Autoridade Aduaneira (AA) Ministériu Finansa, ohin lansa sistema Asycuda World iha Aeroportu Nicolau Lobato Dili, nune’e bele fasilita komérsiu.

Diretór Jerál AA, José António Fátima Abílio, hatete Asycuda World ne’e sai hanesan plataforma eletrónika ba Timor-Leste no sistema ne’e rasik sei sai hanesan plataforma ba janela únika ne’ebé maka Konsellu Ministru aprova ona rezolusaun ida iha inísiu 2017.

“Plataforma ida ne’e sei ajuda tebes liuliu ba Alfándega ho mós importadór sira ne’ebé uza meiu ida husi aeroportu nian para hatama sira-nia merkadoria”, José Abílio hatete iha ámbitu lansamentu ne’e.

Diretór Jerál AA, José António Fátima Abílio. Imajen Egas Cristovão.

Nia dehan sistema ne’e sofistikadu tebes, tanba nasaun barak maka uza atu fasilita komérsiu.

Atu tama janela únika ne’e la’ós serbisu ida fasil, maibé lori prosesu tanba tenke haree husi enkuadramentu legál la’ós husi Alfándega Timor-Leste nian de’it, mas haree mós husi nasaun sira seluk.

Nia afirma konsentra uluk lai ba janela únika nasionál tanba ajénsia barak relevante ne’ebé serbisu hamutuk uza sistema ne’e. Mezmu sistema ne’e Alfándega nia, maibé kuarentena bele uza, saúde, transporte no aviasaun sivíl.

“Kuandu iha posibilidade serbisu saida maka bele integra iha ne’ebá ami mós bele fasilita para ajuda. Ita ida-ida uza sistema para halo kontrolu ba dokumentasaun ne’ebé hanesan, entaun uza de’it sistema ida, fasil liu para halo kontrolu no mós verifikasaun dokumentu sira ne’e. Ida ne’e maka vantajen kuandu uza sistema ida integradu tanba bele asesu iha fatin hotu importante maka iha internét”.

Aléinde ne’e sistema refere ajuda ona despaxante sira atubele prosesa lalais importadór sira-nia bagajen.

Vise-Ministra Finansa, Sara Lobo Brites, hatete ho lansamentu CRAP (custom revenue entry processing) sei ajuda tebes Alfándega iha nia atendimentu ba públiku.

“Durante ne’e iha reklamasaun barak husi ita-nia maluk sira ne’ebé hatama sasán, dala barak mós iha krítika, maibé ita orgullu tanba Alfándega halo duni esforsu embora iha limitasaun, Alfándega kontinua mellora sira-nia serbisu para hatudu hanesan instituisaun ida importante tebes iha nasaun, hanesan odamatan ba merkadoria, la’ós de’it nia papél atu rekolla taxa, maibé mós atu kontrola merkadoria ne’ebé tama”.

Hanesan membru Governu VIII, rona barak krítika mas depois entende didi’ak difikuldade ne’ebé Alfándega hetan maka ministériu nia papél tuir loloos fó liu apoiu, kondisaun para Alfándega hala’o nia serbisu.

Sara afirma benefísiu husi sistema ne’e ba Alfándega rasik maka uza sistema ida modernu no sai efisiente, lalais liu, no mós ba despaxante sira bele hetan atendimentu ida di’ak no la lakon tempu lori dokumentu tun-sa’e.

Benefísiu seluk en jerál, nia dehan Timor-Leste ne’ebé depende loos ba importasaun, entaun merkadoria ne’ebé tama ho lalais no bele asegura produtu sira, tanba bainhira difikuldade ne’ebé importadór sira hasoru iha Alfándega maka la rezolve kauza ba komérsiu ne’ebé depende ba importasaun husi rai seluk.

Diretór Alfándega Aeroportu Dili, Armindo dos Santos, antes ne’e Alfándega uza sistema Asycuda ++ ne’e sistema ida tuan, uza manuál depois Governu tenta oinsá para fasilita merkadoria entaun uza tiha sistema Asycuda World ne’e.

“Sistema Asycuda World uza hotu ona ba fatin hotu, agora daudaun halo ona iha aeroportu (Dili) para bele fasilita merkadoria ne’ebé tama liuhusi aeroportu no mós fasilita sira ne’ebé iha arrival (xegada) karik sira atu selu merkadoria sira ne’e bele link ida ne’e ho banku tanba sistema ne’e modernu, nia bele kapta ba iha banku no ami-nia sistema rasik”.

Tanba ne’e ho lansamentu Asycuda iha aeroportu ne’e haree husi movimentu merkadoria tama iha aeroportu maka’as no distánsia husi aeroportu bá banku mós dook maka sistema ne’e fasilita ema atu labele la’o bá-mai prosesa dokumentu iha edifísiu sentrál AA nian maka fasilita sira hodi bele foti sasán sira ho lalais.

“Entaun iha aeroportu ita hakarak iha mini CRAP para ema sira ne’ebé prepara ona dokumentu la presiza ba to’o iha ne’ebá, sira mai de’it iha ne’e, ami valida dokumentu iha ne’e kuandu loos ona, halo inspesaun bele hasai ona sasán iha aeroportu”, nia katak.

Sobre lansamentu ne’e ba sistema ne’e, Alfándega iha 13 marsu ne’e lansa mós ona Asycuda World iha aeroportu Suai no sei estende ba fatin sira seluk nune’e atendimentu ba merkadoria sira bele la’o ho di’ak liu.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here