Diretór Alfándega Aeroportu Nicolau Lobato, Dili, Armindo dos Santos. Imajen Egas Cristovão.

DILI, (TATOLI) – Diretór Alfándega Aeroportu Nicolau Lobato Dili, Armindo dos Santos, relata serbisu ne’ebé halo durante 2017 to’o 2018 rekolla ona taxa ba kofre Estadu hamutuk liu rihun $766. Husi taxa ne’ebé arrekada ne’e barak liu mak iha karga ninian.

Alfándega Aeroportu Dili kobra taxa husi fatin tolu mak karga (sasán sira ne’ebé tula iha aviaun), arrival (xegada), no postál sira. Taxa tolu ne’e tama hamutuk iha kódigu ida ne’ebé akumula hotu taxa sira ne’ebé selu ne’e.

“Iha 2017 ami konsege rekolla taxa rihun 438 resin depois mai iha 2018 ami esforsu no loloos ami hanoin katak iha situasaun Governu nian (iha impase nia laran) ne’e loloos ami tun, maibé ami rekolla liu tiha ba rihun 766. Ne’ebé nia persentajen la’ós akomoda nasionál, só taxa ne’ebé kobra iha aeroportu”, Armindo hatete iha ámbitu lansamentu Asycuda World iha aeroportu Nicolau Lobato, ohin.

Diretór ne’e dehan ida ne’e maka esforsu ne’ebé halo husi ekipa Autoridade Aduaneira iha Nicolau Lobato nian.

Aléinde kobra reseita, ekipa mós halo sensibilizasaun atu ema koñese Alfándega nian serbisu maka hanesan ida ne’ebé? No mós oinsá atubele kontrola sasán saida de’it maka tama iha aeroportu ne’ebé maka tuir regra no la tuir regra.

Nia informa mós sobre sasán sira ne’ebé tama mai Timor-Leste no kontra regra nune’e Alfándega apreende (foti) mak hanesan sigarru ne’ebé la hetan lisensa husi Ministériu Saúde kuaze kaixa 30, sigarru eletróniku ne’ebé lei bandu iha hitu, sasán seluk hanesan knalpot racing no video pornografia ne’ebé liuhusi aeroportu bainhira iha pasa revista hetan maka la autoriza sai.

Armindo haktuir serbisu sira ne’ebé halo ne’e la’ós Alfándega mesak, maibé hamutuk ho Autoridade Aviasaun Sivíl Timor-Leste, Imigrasaun, Kuarentena no ajénsia seluk no mós seguransa ne’ebé apoia iha serbisu fatin.

Diretór ne’e mós hato’o ekipamentu serbisu liuliu komputadór iha aeroportu nafatin difikulta sira nune’e husu atu atu haree ba kestaun ne’e.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here