Ministru Transporte no Komunikasaun, José Agostinho da Silva. Imajen António Goncalves

DILI, (TATOLI) – Ministru Transporte no Komunikasaun, José Agostinho da Silva, admite estensaun rejistu ba kartaun pre-pagu telemóvel (simcard) ne’ebé agora dadauk halo ba dala ikus ona hodi fó oportunidade ba sira ne’ebé seidauk halo rejistu.

“Estensaun rejistu kartaun simcard estende to’o loron 30 marsu hanesan estensaun ba dala ikus, ho razaun maioria husi kliente seidauk rejista entaun ita fó tan tempu ba sira atu sira bele iha oportunidade para mai rejistu, ida ne’e liga ba seguransa no cyber crime (krime cibernétiku)”, tenik ba jornalista sira iha Palásiu Governu, ohin.

Tuir governante ne’e rejistu kartaun operadór telemóvel ne’e hodi fasilita autoridade nia servisu no kuandu kliente sira la mai rejistu orgaun kompetente sira sei hola medida.

“Ema sira ne’e rejistu hotu ona entaun ita bele deteta, númeru ida pertense ba se?, entaun orsida identidade falsu sira bele deteta, tanba ne’e ba oin ha’u hanoin laiha ona estensaun, ida ne’ebé la mai rejistu, operadór telekomunikasaun no reguladór bele hola pozisaun”, katak.

Enkuantu Autoridade Nasionál Komunikasaun (ANC-sigla portugés) rasik halo ona estensaun ba rejistu simcard ne’e ba dala tolu ona.

Timor-Leste oras ne’e dadauk iha ona operadór telekomunikasaun tolu hanesan Timor Telecom (TT), Telkomcel no Telemor ne’ebé mak opera no iha tempu badak operadór telekomunikasaun foun ho naran CESLINK sei lansa hodi kompete iha merkadu.

Ho populasaun ne’ebé atinje milliaun 1,3, utilizadór ba simcard hamutuk milliaun 1,5 no ema ne’ebé ativu iha internet 560.000.

Nune’e mós ema ema ne’ebé ativu iha mídia sosiál hamutuk 560.000 no husi númeru ne’e, utilizadór 490.000 mak ativu husi telemovel.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here