Aula aberta UNTL ho Profesór José Augusto Brito Pacheco. FOTO TATOLI: Rafy Belo

DILI, (TATOLI) – Profesór José Augusto Brito Pacheco, husi Institutu Edukasaun, Universidade do Minho, Portugal katak motiva estudante sira iha tempu ohin loron kompleksu no difisil tebes, tanba impaktu husi kestaun teknolojia dijitál no mós númeru estudante ne’ebé mak barak demais iha prosesu aprendizajen ida, iha kontextu ohin loron.

“Iha turma ida alunu sira barak tebes ka bainhira turma ida iha estudante na’in 60, 70 no profesór sira fó aula, ladún sempre iha tempu atu motiva alunu sira no alunu sira la sempre iha oportunidade hodi koloka kestaun, nein mós profesór bele diálogu, husu no responde buat sira ne’ebé mak alunu sira husu”, hateten Profesór José Augusto Brito ba jornalista sira iha Kampus Liceu, Universidade Nasionál Timor Lorosa’e (UNTL), ohin.

Akadémiku portugés ne’e akresenta situasaun ne’e akontese vise-versa no rezulta profesór no estudante sira la iha oportunidade no tempu sufisiente atu bele koloka kestaun ba malu no dezenvolve atividade sira.

Tanba ne’e, tuir profesór José Augusto Brito Pacheco katak situasaun ne’e halo alunu sira tuur iha kadeira hanesan pasa tempu to’o hotu no até profesór la iha tempu atu dirije alunu ida ne’e tanba kuantidade estudante iha atividade lesionamentu ida.

“Asegura partisipasaun alunu sira iha eskola laran, iha prosesu aprendizajen”, salienta profesór universitáriu ne’e.

Profesór José Augusto Brito Pacheco esplika kestaun seluk iha ámbitu prosesu aprendizajen mak ho mudansa teknolojia nian, liuliu teknolojia dijitál, ne’ebé introdús hela norma, dezafiu sira.

Nia reforsa katak teknolojia dijitál ohin loron sai fonte aprendizajen iha turma sira barak. Turma no eskola ne’ebé inovadora utiliza teknolojia iha aprendizajen no iha revolusaun. Maske nune’e, tuir akadémiku husi Institutu Edukasaun, Universidade do Minho, Portugal ne’e katak depende mós ba mentalidade oinsá atu utiliza rekursu teknolójiku sira ne’e.

Enkuantu, bainhira la uza teknolojia dijitál, liuliu hanesan telemovel, depende mós ba mentalidade profesór sira nian, oinsá bele proibe estudante sira atu labele uza telemovel la tuir regra ka deznesesária. Bainhira telefone iha bele asegura iha bolsu laran de’it.

Profesór José Augusto Brito Pacheco perante mídia sira pronúnsia mós katak bainhira ita iha sistema baze dadus, teknolojia dijitál hanesan telemovel, ohin loron, nu’udar fonte koñesimentu, informasaun no tenke esplora iha sala-de-aula. Ida ne’e nu’udar dezafiu boot ida katak utilizasaun teknolojia dijitál nu’udar fonte informasaun ba konstrusaun koñesimentu.

“Ohin loron, telemovel, teknolojia dijitál seluk, iha espasu barak liután iha sala-de-aula no tenke utiliza. Ida ne’e dezafiu boot ida,” dehan akadémiku ne’e.

Iha biban hanesan, Profesór José Augusto Brito Pacheco bainhira sai oradór kona-ba “Desafios Educativos Contamporâneos Numa Sociedade Transglobal” afirma, konseitu kompeténsia kompostu husi koñesimentu, kapasidade, atitude no valór sira. Konseitu ne’ebé ita tenke ka lae atu hatene.

Koñesimentu nu’udar kestaun kognitiva, tipu seluk ne’ebé abstratu, teóriku. Depois kapasidade katak buat ne’ebé ita tenke hatene halo. Enkuantu, atitude ne’e ligadu ho ema oinsá atu hanoin no halo no nia valór sira mak buat ne’ebé tenke fahe ba ema seluk mós.

Profesór José Augusto Brito Pacheco esplika tan katak ita tenke promove edukasaun ida ba pás nian, diálogu entre povu no ema sira, iha kontextu respeitu no toleránsia hodi respeitu malu.

Nune’e mós, nu’udar umanu ita tenke asume mós atitude krítika ba realidade sosiál, iha sentidu emansipasaun ema nian no imperativu kosmopolitizmu ka rekoñesimentu ba diferensa no identidade no mós singularidade ema nian.

Inklui, ita halo eskola nu’udar eskada ida hodi halo promosaun sosiál no pesoál no sein diskriminasaun jéneru, rasa no etnia katak nu’udar umanu ita hanesan de’it.

Iha fatin hanesan, Profesór Universidade Nasionál Timor Lorosa’e (UNTL) Vicente Paulino hateten ba profisionál komunikasaun sosiál sira katak kestaun edukasaun, governante Ministériu Edukasaun tenke haree dezafiu tolu prinsipál hanesan edukasaun permanente; ita tenke fokaliza maka’as konvida labarik sira hotu ba eskola.

Segundu, tenke haree mós aprendizajen ba ema hotu tanba haree katak labarik balun la eskola tanba de’it situasaun ekonómika, balun mós haree ba situasaun vontade inan-aman rasik atu haruka oan sira ba eskola.

“Papél eskola nian mak tenke insentiva, konsolida programa edukasaun sívika ba sosiedade tomak ho vizaun ida katak kada labarik ida, futuru ida iha ona nia liman. Entaun, kada labarik ida tenke aprezenta nia aan iha eskola tanba eskola sai hanesan espasu konsolidasaun kreximentu pesoál no mós formasaun valór i kapasidade no mós produsaun koñesimentu ne’e rasik”, dehan akadémiku UNTL ne’e.

Profesór Vicente Paulino reforsa: “Dezafiu sira ne’e Ministériu Edukasaun dezenvolve hahú husi baze, husi ensinu báziku tanba baze ne’e la forte bainhira to’o iha ensinu superiór hetan difikuldade barak, porezemplu, balun dalaruma hakerek mós la tuir regra linguístiku no mós as vezes iha leitura sira iha difikuldade atu lee tuir regra ne’ebé mak iha”.

Profesór ne’e mós konsidera, teknolojia ajuda maka’as atu dezenvolve ita-nia atividade. “Sein ida ne’e ha’u hanoin ita para iha fatin de’it. So que problema ne’e, iha ita ema rasik oinsá mak ita utiliza sai ba di’ak no mós uza teknolojia ne’e sai hanesan fasilitadór ida ba realizasaun ita-nia atividade”, nia rekoñese.

Hodi hatutan: “Kona-ba difikuldade atividade ekonómika, kontextu Timor-Leste, ha’u haree katak maioria ita-nia populasaun la iha sustentabilidade ekonómika hodi sustenta oan sira ba eskola mas ida ne’e hanesan razaun ida dehan katak la iha na verdade ne’e ekonomia iha hela”.

“Ita haree de’it ba lia mate, lia moris. As vezes lia mate, lia moris ne’e ita tau tiha ba kotuk i dehan katak osan la iha mas osan iha hela atu fó benefísiu ba oan sira atu ba eskola. So que ho de’it lia, entaun dehan katak osan la iha. Ekonomikamente, timoroan iha kapasidade atu haruka oan sira ba eskola. Problema esensiál mak ne’e, sira lakohi hatuur nesesidade lia ne’e ba iha oin hodi nune’e governante sira hatene katak tan de’it lia, osan la iha atu haruka oan sira ba eskola,” konklui akadémiku ne’e.

Partisipa iha aula aberta ne’e, estudante sira UNTL husi departamentu no fakuldade sira ne’ebé mak ezite, profesór sira balun no mós interesadu sira balun.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here