Foto google.

DILI, (TATOLI) – Diretora Jerál Agrikultura Ministériu Agrikultura no Peska (MAP), Maria Odete Guterres do Céu, hatete produsaun rai-laran iha kontestu hare nian sei ki’ik, tanba produtividade foin maka tonelada tolu kada ektare.

“Agora, tinan ida ita sura ba ita-nia populasaun ema millaun 1,2. Se ita halo kálkulu karik ema ida bele han grama 250 loron ida, entaun tinan ida ema ida presiza arroz (foos) kilograma 90. Kilograma 90 ne’e multiplika ba ema millaun 1,2, ita presiza maizumenus tonelada rihun 106”, Maria Odete afirma iha Komoro, ohin.

Tuir dadus 2018, Timor-Leste prodús hare tonelada rihun 66, maibé bainhira konverte ba foos entaun iha de’it tonelada foos 36 signifika Timór sei presiza importa foos tonelada 86 para fó han ema millaun 1,2 ne’e.

“Ida ne’e maka ita-nia frakeza ne’ebé ita presiza importa. Kálkulu ida ne’e bazeia ba padraun FAO (Food and Agriculture Organization), maibé ita seidauk halo estudu detallu liu tanba haree modo de vida la’ós ema hotu han etu. Ema ne’ebé osan iha sira iha eskolla, loron ida sira han de’it na’an ida ho ai-fuan ida, ita populasaun barak liu maka han etu, ne’ebé konta kasar ne’e grama 250 loron ida”.

Tanba ne’e iha futuru bainhira buat hotu di’ak tenke estabelese análize konsumu diária para ema han bele sura ona, haree ona eskala ema riku ne’e han saida iha kada loron no ema médiu no ki’ak han saida kada loron.

“Agora, kálkulu ne’e sei kasar tanba ita seidauk iha posibilidade. Análize kálkulu ne’e tenke iha laboratóriu, ema tenke husi custom nia, ema husi agrikultura, saúde, ekipa boot ida hodi halo estudu ba ida ne’e”, nia katak.

Tanba produsaun hare ne’ebé sei menus, maka MAP esforsu atu hasa’e nia produsaun. “Serbisu agrikultura ne’e serbisu inovativu. Ita aplika teknolojia ida ne’ebé ladi’ak ita buka fali teknolojia ida ne’ebé maka bele aplika. Agora daudaun ami uza adubu orgániku naran Popnassa, ami foin daudaun halo iha Betanu, Maliana atu haree took ho adubu orgániku ne’e bele hasa’e nia produtividade ka lae?”.

Aléinde ne’e la’ós adubu de’it, maibé foti mós amostra rai nian tanba tinan-tinan uza hela de’it no atu hatene nia fertilidade ka rai nia bokur ne’e. Tanba ne’e adubu Popnassa ne’e bele aplika nia bainhira fila rai hotu, no bainhira kuda hare ona depois loron 15, 30 no 40 tau adubu to’o kolleita.

“Ne’ebé teste sira ne’e ami halo hela iha kampu hafoin iha inísiu fevereiru ami komesa ona. Agora, halo hela monitorizasaun atu teste took utilizasaun adubu orgániku nia produtividade ne’e to’o hira?”.

Tanba ne’e peskizadór husi diresaun nasionál peskiza aplika nafatin teknolojia ne’ebé maka bele hasa’e produsaun iha país.

Maria Odete afirma atu hasa’e produsaun iha rai-laran, Diresaun Jerál Agrikultura la serbisu mesak, maibé hamutuk ho Universidade Nasionál Timor Lorosa’e (UNTL) no Aciar (Australian Centre for International Agricultural Research), ajénsia husi Austrália halo peskiza hamutuk la’ós de’it ba hare, batar, mas ba fore, Ai-Kameli no seluk tan.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here