Primeiru-Ministru, Taur Matan Ruak. Imajen: Egas Cristovão

DILI, (TATOLI) – Primeiru-Ministru, Taur Matan Ruak, hateten nia kontinua ko’alia ho Prezidente Repúblika atu bele solusiona lista kandidatu membru governu sira ne’ebé sei pendente.

“Preokupasaun ne’e la’ós ha’u nian de’it maibé Prezidente Repúblika mós preokupa ida ne’e. Tan ne’e ami kontinua diskute para bele ultrapasa. Sei lori tempu maibé ha’u fiar katak loron ida sei hetan solusaun ba problema ne’e”, Xefe Governu ba jornalista sira iha Palásiu Prezidente Nicolau Lobato, Bairru Pité, kinta ne’e hafoin soru-mutu ho Xefe Estadu, Francisco Guterres Lú Olo.

Nia dehan bele troka kandidatu membru Governu ne’ebé pendente maibé tenke koordena ho primeiru-ministru nu’udar xefe governu.

“Partidu balun hakarak troka kandidatu membru Governu ne’ebé pendente, ha’u maka primeiru-ministru, sira tenke ko’alia ho ha’u. Agora sira ba ko’alia tiha iha kotu-kotuk depois atu troka ne’e labele. Primeiru-ministru hanesan komandante governu nian, entaun ba kestaun ida ne’e tenke liuhusi primeiru-ministru”, akresenta Taur.

Tuir eis lider rezisténsia ne’e afirma bele iha proposta opiniaun maibé desizaun ikus ne’e iha primeiru-ministru nia liman.

Entretantu, durasaun enkontru entre primeiru-ministru no prezidente repúblika ba loron ohin nian lahanesan baibain tanba hala’o besik oras rua nia laran (hahú tuku 9.30 to’o 11.25).

Baibain, enkontru hala’o iha tuku 9.00 no durasaun kle’ur liu maka oras ida nia laran. “Ko’alia buat balun ne’ebé ami nian de’it, tan ne’e ami labele fakar segredu ba imi”, afirma Xefe Governu.

Nia hatutan enkontru ohin ne’e hanesan previléjiu ba nia, tanba fó tempu barak ba nia hodi troka ideia kona-ba problema nasaun nian, liu-liu funsionalizmu públiku no problema lejizlasaun.

“Tanba ne’e ha’u kontente loos no agradese ba prezidente repúblika nia disponibilidade ne’ebé simu ha’u ho durasaun kle’ur”, tenik.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here