Vise-Ministru Administrasaun Estatál Abílio José Caetano. Imajen/António Gonçalves

DILI, (TATOLI) – Komisaun D Parlamentu Nasionál (PN) ne’ebé trata asuntu Ekonomia no Dezenvolvimentu konvida Vise Ministru Administrasaun Estatál, Prezidente Autoridade Munisípiu Dili no Diretór Nasionál Dezeña Orden Públika hodi koa’lia kona-ba jestaun lixu iha kapitál.

“Ami aproveita klarifika buat balun ne’ebé relasiona ho jestaun lixu, tanba agora dadaun 2019, 2020 no 2021, limpeza iha sidade Dili laran ne’e sei manuál no responsabilidade ba munisípiu”, tenik Vise Ministru Administrasaun Estatál, Abílio José Caetano, ba jornalista sira iha PN, ohin.

Nia hateten agora dadauk VIII Governu adopta polítika VI Governu ho naran polítika melloramentu rekolla rezídiu sólidu urbanu iha Dili, ne’ebé atu privatiza sidade.

“Polítika ne’e mak kontinua nafatin no espera katak iha 2022 ou 2023 limpeza iha Dili laran la’ós ona Governu lokál maibé ita sei entrega ba setór privadu ne’ebé sei halo kontratau ho munisípiu Dili para sidade Dili tenke moos”, katak.

Kona-ba jestaun lixu, nia dehan agora dadauk sei haree iha munisípiu Dili tanba populasaun barak no aumenta ba bebeik.

“Sei populasaun mak aumenta, lixu mós aumenta, entaun ita nia kapasidade atu rekolla lixu ho di’ak ne’e la proporsionál ho aumentu populasaun”, katak tan.

Nune’e mós enkontru oin ko’alia mós kona-ba kestaun animál. “Iha hanoin ida katak oinsá bele proibe (bandu), tanba ita moris iha sidade laran, se-bele labele kria animál hanesan fahi, bibi, karau ou bele kria iha área rurál para evita má estar (moris la saudavel) husi viziñu sira”, akresenta.

Governante ne’e hatutan: “Ami simu rekomendasaun, oinsá mak bele hadi’a jestaun lixu no kriasaun animál ne’e, se bele ita proibisaun (bandu) iha sidade Dili”. 

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here