Asesór prinsipál MTKI, Jacinto Rigoberto

DILI, (TATOLI) – Maski to’o oras ne’e seidauk iha ministru definitivu ba Ministériu Turizmu, Komérsiu no Indústria (MTKI), maibé la fó implikasaun ba serbisu ministériu relevante nian.

Daudaun ne’e, responsabilidade ministru MTKI nian tutela hela ba Ministru  Estadu Prezidénsia Konsellu Ministru, Hermenegildo “Agio”Pereira. Ho ne’e, asesór prinsipál ba MTKI, Jacinto Rigoberto, garante katak, serbisu iha MTKI la’o normal hanesan ho ministériu sira ne’ebé iha ona ministru definitivu.

“To’o agora serbisu la’o normál hanesan ministériu hirak ne’ebé iha ona ministru”, hateten Jacinto Rigoberto, hodi respondeTATOLI hafoin, ohin, iha Palásiu Governu, hafoin  hasoru malu ho Primeiru Ministru, Taur Matan Ruak.

Nia lia tun dehan, durante ministru definitivu ba MTKI seidauk iha sei hetan orientasaun, aprovasaun no desizaun husi Ministru interinu, Hermenegildo Pereira, hodi ezekuta serbisu hotu ne’ebé kabe ba responsabilidade polítika MTKI nian.

“Durante ne’e, ministériu la’o di’ak hela, tuir orientasaun ho ministru interinu ba implementasaun programa ho ezekusaun orsamentu hanesan ho ministériu sira seluk”, Jacinto Rigoberto hateten.

Tuir nia haree to’o oras ne’e diresaun jerál ho diresaun nasionál MTKI nian hala’o serbisu ho espíritu nasionalizmu no kontribui ba implementasaun programa ministériu nian ho di’ak tebetebes.

Programa prioridade ba MTKI nian maka setór turizmu, Jacinto Rigoberto esplika katak, oinsá atu dezenvolve poténsia turístika sira, tanba setór ne’e ba futuru sei fó retornu ba Estadu.  Nune’e mós setór indústria, katak potensialidade ba indústria ki’ik hanesan halo tais, artezanatu no seluk tan sei iha nivel eskalaun ki’ik, tanba ne’e, oinsá maka atu dezenvolve indústria ne’e bele sei indústria boot atu bele korresponde ba indústria mina ne’ebé maka Xefe Negosiador Prinsipál ba Fronteira Marítima,  Kayrala Xanana Gusmão, luta hela.

Nia mós subliña katak, setór komérsiu mós iha ona polítika, atu oinsá bele regula atu komersiante nasionál sira bele promove produtu ba iha nivel internasionál, nune’e bele fó rendimentu ekonómiku mai Timor-Leste.

Jornalista: Zezito Silva

Editór: Francisco Simões

HAKEREK NO HATÁN

Please enter your comment!
Please enter your name here