Vise Prezidente KPI, S.Rahmat Arifin entrega prenda ba Prezidente KI, Virgílio Guterres, Kuarta (13/3/2019), iha Edifisiu KPI, Jakarta, Indonézia. Imajen/Francisco Simōes

JAKARTA, (TATOLI)—Konsellu Imprensa (KI) Timor-Leste ho Komisi Penyiaran Indonézia  (KPI-siglaIndonézia) hahú ona inisia diskusaun atu hamosu kooperasaun iha area fortalesimentu institusionál no kapasitasaun rekursu umanus.

Liuhusi enkontru formal iha salaun Edifísiu KPI, Jakarta, Indonézia, ohin, Prezidente KI, Virgílio da Silva Guterres, ho membru sira, kompostu husi José Ximenes, Paulo de Araújo, Francisco Belo Simões da Costa, no asesór programatiku KI nian, Rigoberto Monteiro, halo diskusaun kle’an ho komisáriu no kargu xefia ezekutivu KPI nian, kona-ba intensaun kooperasaun entre parte rua.

Parte KPI nian ne’ebé hola parte iha sorumutuk diskusaun ne’e, kompostu husi  Komisáriu KPI, Ubaidillah, Vise Prezidente (Wakil Ketua-siglaIndonésia) KPI, S. Rahmat Arifin, Xefe Sekretariadu, Maruli Matondang, inklui mós dirijente no kargu xefia sira iha KPI.

Membru Konsellu Imprensa Indonézia (Dewan Pers Indonesia/DPI-sigla Indonézia), Chirstiana Chelsia Chan, mós hola parte iha diskusaun inísiu ne’e hodi fó nia apresiasaun no idea jerál balun kona-ba esperiénsia kooperasaun entre KI ho DPI durante ne’e.

“Konsellu Imprensa hakarak inisia diskusaun kona-ba posibilidade kooperasaun ho KPI atu oinsá mak KPI bele ajuda no fasilita transforma informasaun no fahe koñesimentu ba malu kona-ba serbisu monitorizasaun radiodifuzaun sira nian”, hateten Prezidente KI, Virgílio Guterres, durante sesaun diskusaun ho KPI.

Lori KI nia naran, Prezidente Virgílio Guterres, hato’o apresiasaun boot ba KPI ne’ebé durante ne’e komunika ona ho KI atu oinsá mak parte rua bele kolabora malu atu bele hamosu akordu kooperasaun institusionál.

KPI nu’udar instituisaun ida ne’ebé independente iha Indonézia ho nivel ne’ebé hanesan ho instituisaun estadu sira seluk ho funsaun hanesan órgaun reguladór ba radiodifuzaun iha Indonézia. Komisaun ne’e harii iha tinan 2002 ho Lei Repúblika Indonézia númeru: 32 tinan 2002 kona-ba radiodifuzaun.

KPI kompostu husi KPI Sentrál, no KPI munisipál ne’ebé hala’o knaar iha nivel provínsia ho Papél no ámbitu serbisu mak halo regulamentu ba radiodifuzaun públiku, privadu no komunidade.

Biban ne’e, Vise Prezidente KPI, S. Rahmat Arifin ho Komisariu KPI, Ubaidillah, hato’o KPI nia prontidaun atu serbisu hamutuk ho KI iha area sira ne’ebé KI ho KPI rasik sei formula liu husi akordu kooperasaun.

Liu husi sorumutuk ne’e, Rigoberto Monteiro nudár asesór programatiku KI nian aprezenta ezbosu nota entendimentu nudár baze ba KI atu iha akordu kooperasaun ho KPI. Ho nune’e, Vise Prezidente KPI, S. Rahmat Arifin no Komisariu KPI, Ubaidillah, simu idea báziku ne’e hodi tau iha ajenda importánsia atu diskute kle’an liu tan iha plenária KPI nian.

“Ami simu ho kontente atu trasa kooperasaun ho KI, tanba ne’e, ami sei komunika lalais ho ami nia  Ministériu Negósiu Estranjeiru no mós Ministériu Komunikasaun no Informasaun (KOMINFO-siglaIndonézia) atu bele fó mós sira nia paresér kona-ba akordu ne’ebé mak ita atu halo hamutuk”, hateten S. Rahmat Arifin.

Tuir estatutu KPI nian autoriza deit atu halo akordu institusionál iha rai laran no kuandu atu halo akordu bilateral ho instituisaun nasaun seluk nian tenke iha koñesimentu ho instituisaun relevánsia, liu-liu MNE Indonézia ho KOMINFO.

Rahmat Arifin aprofunda katak, KPI sei halo esforsu hotu atu serimónia asinatura kooperasaun entre KI ho KPI bele realiza iha loron 1 Abril 2019, hodi komemora mós loron nasionál radiodifuzaun no kongresu nasionál (Rakernas-siglaIndonézia) KPI nian ne’ebé atu hala’o iha Banjarmasin-Indonézia.

“Espera katak, buat hotu la’o tuir ita nia espetativa no ami sei enkaixa programa asinatura akordu entre ita  KPI ho KI iha serimónia Rakernas (Rapat Koordinasi Nasional) KPI nian ne’ebé atu hala’o iha Banjarmasin. Ami sei haruka konvite ba KI hodi hola parte mós iha eventu ne’e”, hateten S. Rahmat Arifin.

Liu husi enkontru ne’e, KPI ho KI konkorda malu ona hodi harii ekipa serbisu hamutuk atu elabora diak liu tan konteúdu nota entendimentu ba kooperasaun  nian molok lori ba asina iha Banjarmasin.

KI ho KPI iha espiritu hanesan atu promove liberdade imprensa no liberdade espresaun liuhusi fortalesimentu institusionál no dezenvolvimentu polítika, tanba ne’e KI ho KPI esplora ideia  atu  tulun malu ba konseitu entendimentu ida ne’ebé fó benefísiu ba malu atu promove liberdade imprensa no liberdade espresaun.

Oportunidade ne’e delegasaun KI nian mós halo observasaun direita ba serbisu monitorizasaun KPI nian ba konteúdu tomak estasaun radiodifuzaun  ne’ebé estabelese iha Indonézia laran tomak, inklui observa fasilidade KPI nian hodi halo serbisu analiza no simu keixa liuhusi kanál internet.

Iha Tersa horseik, KI mós estabelese ona nóta entendimentu ho PMN (Pusat Mediasi Nasional-sigla Indonézia) hodi elabora serbisu hamutuk ba dezenvolvimentu institusional no kapasitasaun rekursu umanus.

Objetivu husi nota ne’e atu kolabora malu hodi promove serbisu mediasaun nian entre parte rua no iha espíritu hanesan atu reforsa fortalesimentu institusionál iha area mediasaun. Seluk fali, parte rua, ida-idak iha kapasidade atu fó tulun ba konseitu entendimentu ida ne’ebé fó benefísiu atu promove diresaun.

EKIPA

HAKEREK NO HATÁN

Please enter your comment!
Please enter your name here