Foto Espesiál.

DILI, (TATOLI) – Governu liuhosi desizaun Konsellu Ministru (KM), ohin aprova proposta Ministru Interiór Interinu, Filomeno da Paixão de Jesus, kona-ba nomeasaun Faustino da Costa hanesan Komandante Jerál no Mateus Fernandes nu’udar Komandante Jerál daruak Polísia Nasionál Timor-Leste (PNTL), períodu 2019-2023.

“Konsellu-ministru simu mós proposta Ministériu Defeza, Ministru Interiór Interinu, ba Komandante Jerál PNTL no segundu komandante PNTL nian foun ba tinan haat ne’ebé komandante jerál foun Komisáriu Faustino da Costa, ba Komandante Jerál segundu mak superintendente xefe Mateus Fernandes”, informa Ministru Estadu Prezidénsia Konsellu-ministru, Hermenegildo “Agio” Augusto Cabral Pereira, perante mídia iha Palásiu Governu hafoin enkontru KM.

Komisáriu Faustino da Costa antes ne’e hanesan segundu Komandante Jerál PNTL depois Komisáriu Júlio Hornay. Enkuantu, Mateus Fernandes nu’udar Superintendente Xefe PNTL.

Nomeasaun Konsellu-ministru ba figura rua ne’e hodi substitui Komandante Jerál, Júlio Hornay, ne’ebé sei termina mandatu iha fulan ne’e loron 27, hafoin hala’o nia kna’ar iha tinan haat nia laran.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here