Vise Xefe Estadu Maior FALINTIL-Forsa Defeza Timor-Leste (F-FDTL), Domingos Raul Falur Rate Laek. Imajen António Goncalves

DILI, (TATOLI) – Vise Xefe Estadu Maior FALINTIL-Forsa Defeza Timor-Leste (F-FDTL), Falur Rate Laek, relata situasaun lojístika F-FDTL nian ba Prezidente Repúblika, Francisco Guterres Lú Olo.

“Ha’u hato’o asuntu ne’ebé krítiku maka problema lojístiku, pesoál no medida saida maka prevene para rezolve situasaun krítiku ida ne’e”, Falur ba jornalista sira iha Palásiu Prezidente Nicolau Lobato, Bairru Pité, kuarta ne’e hafoin hasoru xefe Estadu.

Nia esplika problema ne’ebé instituisaun enfrenta maka infraestrutura, manutensaun transporte operasionál, uniforme ba forsa sira no orsamentu ba alimentasaun.

Eis lider rezisténsia ne’e afirma iha duni orsamentu jerál Estadu ba tinan ne’e ne’ebé koloka ba F-FDTL atu solusiona problema, maibé prosesu sei atrazu tanba presiza liuhusi prosedimentu legál.

“Ita utiliza orsamentu ne’e tenke liuhusi presedimentu legál ida, tanba se lae ita bele ba para hotu iha Komisaun Antí Korrupsaun (KAK) no prizaun”, subliña.

Kona-ba situasaun seguransa rai laran, Falur tenik situasaun normál hikas tanba oho malu, baku malu no provoka malu menus ona kompara ho fulan hirak ba kotuk.

“Estabilidade agora la’o normál. Movimentu arte marsiál tún, nune’e mós problema oho malu no baku malu. Ha’u ohin dadér simu telefone dehan iha Uatulari, Vikeke maka akontese oho malu maibé ne’e problema interna família nian liu-liu liga ba adat ka kultura. Enkuantu, situasaun nivel nasaun nian estável”, akresenta.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here