DÍLI, (TATOLI)-Ministru Negósiu Estranjeiru no Kooperasaun (MNEK), Dionísio Babo Soares, ho Sekretáriu Estadu Formasaun Profisionál no Empregu (SEFOPE), Julião da Silva, sei esplora posibilidade ho Governu Japaun atu bele simu mós traballadór timoroan.
Atu iha interasaun di’ak liu tan ho Governu Japaun kona-ba posibilidade ne’e, Ministru Dionísio Babo Soares, ho Sekretáriu Estadu Julião da Silva, semana oin, sei dezloka ba Japaun.
“Ami ba hamutuk atu halo serbisu rua. Ida kona-ba serbisu bilaterál entre ita ho Japaun. Seluk fali, serbisu bilaterál mós iha relasaun ho posibilidade ba Japaun bele simu, karik, ita-nia ema serbisu iha ne’ebá,” informa Ministru Dionísio Babo Soares ba jornalista, ohin, iha Palásiu Governu.
Ministru Dionísio Babo, mensiona katak, Japaun la’os hili ema naran de’it, tanba ne’e, tenke hatene lingua no tenke iha abilidade (skill). “Iha Japaun buat hotu tuir lei kompara ho ita nian tanba ita foin mak hahú. Espera, ita-nia maluk sira ba iha ne’ebá para bele aprende liután hodi bele mai aplika iha ita-nia rain”, tenik Ministru Dionísio Babo.
Notísia relevante; http://www.tatoli.tl/2019/01/mnek-sefope-hasoru-malu-koalia-oportunidade-neebe-japaun-oferese/
Jornalista: Rafy Belo
Editór: Francisco Simões