Ministru Defeza no Seguransa, Filomeno da Paixão de Jesus. Imajen TATOLI/António Goncalves

DILI (TATOLI)—Ministru Defeza no Seguransa (MDS), Filomeno da Paixão de Jesus, simu ona  pakote rua kona-ba kandidatu Komandante Jerál (Komjer) Polísia Nasionál Timor-Leste (PNTL) ba període mandatu 2019-2023.

Pakote ne’ebé Ministru Filomeno Paixão de Jesus, simu ona ne’e sei aprezenta ba iha reuniaun Konsellu Ministru (KM), Kuarta aban. “Pakote iha rua maibé ha’u hanesan Ministru Interiór, ha’u tenki te’in tasak maka lori aprezenta ba Konsellu Ministru atu deskuti. Entaun, ha’u sei submete pakote ida de’it ba Konsellu Ministru”, hateten Ministru Filomeno Paixão, ba jornalista sira iha Palásiu Prezidente Nicolau Lobato, Bairru Pité,  hafoin hala’o soru-mutu ho Prezidente Repúblika, Francisco Guterres Lú Olo, ohin.

Ministru Filomeno Paixão, mós dehan,  nia sei ba haree fali lista ofisiál PNTL katak, ofisiál PNTL ida ne’ebé maka priénse kondisaun atu bele sai komjer PNTL. Tanba  ne’e, nia seidauk bele fó sai sé maka iha pakote rua ne’e hodi hein desizaun ikus husi  Konsellu Ministru.

Nia hatutan, kandidatu komjer pakote rua ne’e la mai hosi ema li’ur, maibé mai husi PNTL laran no  estrutura atuál PNTL la tama iha lista pakote rua ne’e.

Eis Vise Xefe Estadu Maior F-FDTL ne’e haklaken katak kritéria atu sai kandidatu komjer PNTL maka hannesan ema ne’e ho antesedénsia mínimu tinan haat asumi kargu Superitendente Xefe, hasai kursu kona-ba defeza no seguransa.

Mandatu atuál Komjer PNTL, Júlio da Costa Hornay ho nia Adjuntu Komisáriu, Faustino da Costa, sei ramata iha 27 Marsu, tinan ida ne’e, tanba kompleta ona tinan haat.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here