President KI, Virgílio da Silva Guterres ho Diretor Ezekutivu PMN, Ahmad Fahmi Shahab, Tersa (12/3/2019), iha Jakarta, asina nota entendimentu kona-ba mediasaun. Foto/ KI.

JAKARTA, (TATOLI) – Konsellu Imprensa (KI) Timor-Leste ho Pusat Mediasi Nasional (PMN-sigla Indonézia) iha Jakarta, ohin, asina nota entendimentu atu bele serbisu hamutuk iha área mediasaun nian.

Nota entendimentu ne’e asina direta husi Prezidente KI, Virgílio da Silva Guterres,  ho Diretur Ezekutivu PMN, Ahmad Fahmi Shahab, iha Edifísiu PMN, Gedung Adi Puri, Wisma Subud No.I, Fatmawati, Jakarta-Indonézia.

Objetivu husi nota ne’e atu kolabora malu hodi promove serbisu mediasaun nian entre parte rua no iha espíritu hanesan atu reforsa fortalesimentu institusionál iha area mediasaun. Seluk fali, parte rua, ida-idak iha kapasidade atu fó tulun ba konseitu entendimentu ida ne’ebé fó benefísiu atu promove diresaun.

“PMN kontinua sai nafatin prioridade KI nian nudár parseiru atu bele fasilita formasaun ba funsionáriu KI nian iha area mediasaun”, hateten Prezidente KI, Virgílio da Silva Guterres.

Virgílio espera katak, PMN bele apoiu nafatin mediator sira ne’ebé mak hasai ona sira nia kursu iha PMN, atu nune’e, ba oin bele estabelese mós formaliza idea  ruma iha Timor-Leste tuir Timor nia nesesidade oinsá rezolve kazu ki’ik sira.

Membru KI, Paulo de Araújo, ne’ebé akompaña mós serimónia asina nota entendimentu ho PMN ne’e, aprezenta katak, mediasaun importante iha Timor-Leste atu bele asiste rezolve problema antes ba Tribunal. Nune’e, bele hamenus kazu ki’ik sira ne’ebé bele rezolve liuhusi diálogu no akordu.

Diretór Ezekutivu PMN, Ahmad Fahmi Shahab, hato’o nia laran ksolok tanba PMN kontinua hetan fiar husi KI atu kolabora malu nudár parseiru importante hodi fasilita treinamentu mediasaun ba funsionáriu sira KI nian tuir nesesidade KI nian.

“Onra boot ida ba ami PMN atu serbisu no fó asisténsia ba Konsellu Imprensa. Ami prontu serbisu hamutuk ho KI”, hateten Ahmad Fahmi Shahab.

Liuhusi akordu serbisu hamutuk entre Sekretáriu Estadu Komunikasaun  Sosiál (SEKOMS) ho PMN iha tinan 2017 fasilita ona treinamentu ba membru  no funsionáriu KI iha area mediasaun. Haree ba inisiativa pozitivu ne’e, KI deside atu kontinua fortifika kooperasaun ho PMN.

KI nu’udar instituisaun independente ho papél atu promove Liberdade Imprensa tuir Lei Komunikasaun Sosiál, Timor-Leste, Númeru5/2014, artigu44; (Jornal da Repulica, Série I, No: 39, 19 de Novembro de 2014). 

KI mós iha nia kompeténsia atu rezolve disputa entre públiku ho órgaun no meius komunikasaun sosiál sira  liuhusi mediasaun. Tanba ne’e, KI estabelese nota entendimentu ho PMN atu oinsá mak fasilita mós treinamentu mediasaun nian ba funsionáriu sira KI nian.

Oras ne’e, KI prontu ona simu keixa no mós rezolve disputa sira liuhusi mediasaun iha area komunikasaun sosiál. Iha mós disputa balun ne’ebé mosu husi konteúdu  produtu jornalistiku mak KI rezolve ona liuhusi mediasaun.

PMN nu’udar instituisaun ida ne’ebé profisionál no independente ho nia vizaun atu promove mediasaun iha Indonézia. PMN hetan akreditasaun husi  Tribunal Supremu  Indonézia (Mahakmah Agung-sigla Portuges), to’o ohin loron tama ona ba períodu dalimak, liuhusi Diploma Prezidente Tribunál Rekursu Repúblika Indonézia nú: 95/KMA/SK/V/2018, loron 17 fulan Maiu tinan 2018. Ho akreditasaun ida ne’e, PMN hetan fiar husi Tribunál Supremu hanesan instituisaun ida ne’ebé fornese formasaun no fornese Sertifikadu ba Mediadór sira iha Indonézia.

PMN mós nudár membru fundadór ba Asosiasaun Mediasaun Asian (AMA) no fó tiha ona formasaun iha nivel internasional.

Durante ne’e, PMN mós fó ona treinamentu mediasaun ba instituisaun sira iha Timor-Leste mak  hanesan husi Sekretáriu Estadu Formasaun Profisionál no Empregu (SEPFOPE), Provedór  dos Direitus Umanus no Justisa (PDHJ-siglaPortugés) ONG nasionál Belun, ho  Konsellu Imprensa (KI).

Durante  estadia iha Jakarta-Indonézia, KI mós sei estabelese akordu no nota entendimentu ho instituisaun relevánsia sira ne’ebé serbisu ba area kapasitasaun institusionál  no kapasitasaun rekursu umanus nian iha area Komunikasaun Sosiál,  kompostu husi Dewan Pers Indonesia (DPI), Lembaga Pers Dr. Soetomo (LPDS), Komisi Penyiaran Indonesia (KPI-sigla Indonézia), Lembaga Bantuan Hukum (LBH-sigla Indonézia)  Pers, inklui sei halo enkontru ho International Federation of Journalist (IFJ-sigla Ingles) no Aliansi Journalist Independent (AJI).

Ekipa

HAKEREK NO HATÁN

Please enter your comment!
Please enter your name here