Ministru Negósius Estranjeirus no Kooperasaun Dionísio da Costa Babo Soares. Imajen Egas Cristovão

DILI, (TATOLI) – Ministru Negósiu Estranjeiru no Kooperasaun, Dionísio Babo Soares, hatete governu kontinua rekoñese timoroan sira ne’ebé hela permanente no servisu iha estranjeiru. 

“Presta atensaun atu fasilita, mas la’ós atu ba rezolve buat sira ne’ebé mak ki’ik no privadu tebes”, katak Ministru ba TATOLI hafoin enkontru Konsellu-Ministru iha Palásiu Governu, ohin.

Nia hatutan: “Fasilita, purezemplu; sira presiza buat ruma, entaun ita tenke reforsa ita-nia embaixada sira para bele apoia maluk sira ne’e, hanesan trata sira-nia surat balun. Surat sira ne’ebé mak Ministériu Negósiu Estranjeiru bele rezolve”.

Governante ne’e esplika atu trata pasaporte ba sidadaun ne’e kabe ba kompeténsia Ministériu Justisa (MJ) no ida ne’e mós MJ nia polítika. Purezemplu atu trata pasaporte tenke mai trata iha ne’e maibé Ministériu Negósiu Estranjeiru fasilita informasaun, primeiru.

Segundu, iha fatin sira ne’ebé mak timoroan barak, governu sei estuda hela mekanizmu apoiu ne’e. Purezemplu bele liuhusi serbisu estruturál sira ne’ebé mak iha embaixada ou bele mós haree husi  serbisu ne’ebé bolu delegasaun serbisu ne’ebé bele apoiu iha ne’ebá.

Terseiru, ita mós bele haree mós servisu seluk hanesan, purezemplu, ko’alia ho banku sira para sira haruka osan mai karik liuhusi banku sira.

“Ko’alia mós asuntu sira ne’ebé mak espesífikamente haree ba iha fasilidade informasaun kona-ba kestaun espesífiku sira ne’ebé presiza duni apoiu husi governu. Mas governu labele ba mete fali ba buat ne’ebé privadu tebes”, dehan diplomata timoroan ne’e.

Kona-ba posibilidade kria esbosu ruma hodi bele reforsa atensaun ba timoroan sira iha estranjeiru, governante ne’e akresenta halo liuhusi embaixada Timor-Leste sira iha estranjeiru.

“Iha rai balun, ita husu embaixada sira serbisu hamutuk ho timoroan sira para halo rejistu”, hateten Ministru Negósiu Estranjeiru no Kooperasaun.

Eis-ministru Justisa ne’e haktuir iha Korea Sul timoroan barak uluk ba liuhusi SEFOPE (Sekretáriu Estadu Formasaun Profisionál no Empregu) serbisu iha kompañia sira balun iha Korea maibé depois to’o tiha iha ne’ebá balun deside ba fali kompañia seluk.

“Entaun ita tenke halo koordenasaun ho governu Korea nian para haree, tanba ema sira ne’e ba atu serbisu i sira-nia viza fó hela fatin entaun sira bele halai ba kompaña seluk. Ita tau-matan hela para, karik iha buat ruma ne’ebé mak iha relasaun ho kestaun legál ho nasaun ne’ebá nian, sira komunika kedas ba ita”, friza governante ne’e.

Nia hatutan koordenasaun hanesan ne’e halo ho governu Xina. Nia fó ezemplu timoroan ba de’it no serbisu iha ne’ebá, ita la hatene, depois família buka, entaun ita kontaktu kedas ho governu Xinesa para halo buat sira ne’e hotu. Hanesan ne’e mós nasaun sira seluk hanesan Austrália, Inglatera, Irlanda.

“Foin dadauk ha’u haruka surat ida ba Ministru Negósiu Estranjeiru Portugal nian hodi haree katak sira halo hela pendataan, fó informasaun kona-ba sidadaun Timór, portugés sira ne’ebé mak serbisu iha ne’ebá, kuandu akontese BREXIT karik, sira halo nusa?”

“Entaun, ita kolabora tanba mezmu timoroan sira ne’e barak uza pasaporte portugés maibé sira timoroan. Ita serbisu hamutuk halo nusa mak bele rezolve kestaun ne’e entre país rua”, afirma.

Polítika atu asegura no tau-matan komunidade timoroan sira iha estranjeiru, deskreve iha programa oitavu governu konstitusionál, pájina 134, númeru 6.12 (Komunidade timoroan iha estranjeiru). Katak, Governu empeñadu atu hametin lasu ne’ebé bele hametin ita-nia kompatriota sira iha estranjeiru.

Ita entende katak, apezarde sirkunstánsia la hanesan ne’ebé bele halo timoroan barak husik hela ita-nia rai hodi ba buka seguransa no kondisaun vida ne’ebé di’ak iha rai seluk, ne’e fundamentál tebes katak ita mantein nafatin, no se bele karik hametin liután, lasu ne’ebé liga timoroan tomak iha estranjeiru ho Repúblika Demokrátika Timor-Leste.

Ita-nia kompatriota sira iha estranjeiru sai meiu di’ak ida hodi halo promosaun ida ba ita-nia País iha estranjeiru. Foin dadaun ne’e, liuhosi proposta Governu nian, Parlamentu Nasionál aprova ona lejislasaun ida ne’ebé permite ba ita-nia kompatriota sira iha estranjeiru hodi halo inskrisaun ba resenseamentu eleitorál, hodi haree sira-nia partisipasaun iha ita-nia prosesu eleitorál ne’ebé hala’o iha tinan 2017 no 2018.

Partisipasaun polítika, aleinde sai nu’udar direitu fundamentál ne’ebé rekoñesidu ba sidadaun timoroan tomak, hanesan mós instrumentu importante ida hodi hametin ligasaun ita-nia konsidadaun sira ba iha ita-nia Komunidade nasionál.

Governu determinadu tebes atu kontinua promove medida sira ne’ebé bele apoia ba ita-nia kompatriota sira ne’ebé hela iha estranjeiru no hametin liután nia ligasaun ho Timor-Leste, nune’e, propoin atu hala’o tarefa hirak hanesan; aprova lei ne’ebé permite atu asegura prestasaun servisu públiku ba sidadaun timoroan iha estranjeiru, liuhusi Embaixada no Konsuladu sira Repúblika Demokrátika Timor-Leste iha estranjeiru.

Hametin meius hirak ne’ebé iha Embaixada no Konsuladu sira Repúblika Demokrátika Timor-Leste nian iha estranjeiru hodi fó prestasaun servisu kona-ba rejistu no notariadu ba sidadaun sira ne’ebé hela iha rai li’ur husi teritóriu nasionál.

Inklui, hatama mekanizmu hodi apoia no protesaun Konsulár ba sidadaun timoroan ne’ebé hela iha estranjeiru no hadi’a mekanizmu hodi fahe informasaun ba komunidade timoroan iha estranjeiru, ne’ebé relasiona ho vida no ho interese ita-nia nasaun.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here