Prokuradór Jerál Repúblika (PJR), José Ximenes. Imajen/Egas Cristovão

DILI, (TATOLI) – Prokuradór Jerál Repúblika, José da Costa Ximenes, hateten Ministériu Públiku (MP) sei uza kuadru legál hasoru deputadu bankada CNRT, Francisco Kalbuadi Lay, ne’ebé antes ne’e hetan notifikasaun.

Nia esplika kuadru legál ne’e maka liuhusi hato’o pedidu ba Parlamentu Nasionál iha tempu oin mai atu hasai Kalbuadi nia imunidade no submete ba prosesu investigasaun hosi ministériu públiku, bainhira hetan ona autorizasaun hosi Parlamentu Nasionál.

“Atu hateten de’it katak bainhira nia (Kalbuadi) fila fali mai, mandatu detensaun ne’e expire tiha ona. Agora dadauk nia ba fali hanesan membru Parlamentu Nasionál. Purtantu, saida maka ita bele halo, ita sei atua tuir kuadru legál ne’ebé iha”, nia dehan ba jornalista sira iha Palásiu Prezidente Nicolau Lobato, Bairru Pité, segunda ne’e.

Ximenes husu ba ema hotu, liu-liu polítiku na’in sira atu labele politiza Ministériu Públiku.

“Ha’u laiha projetu polítiku iha Ministériu Públiku. Notifikasaun ne’ebé ita halo tuir kuadru legál ne’ebé iha. Ha’u lakohi lori Ministériu Públiku ne’e ba dalan polítiku. Husik polítiku sira diskute sira nia kestaun polítika”, subliña.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here