DILI, (TATOLI) – Ofisiál FALINTIL-Forsa Defeza Timor-Leste (F-FDTL) hosi komponente Navál hamutuk na’in 25 tuir treinamentu ho tema kna’ar F-FDTL no diretu ema nian ne’ebé oferese hosi Provedória diretu ema nian no justisa (PDHJ-Sigla Portugués) durante loron lima hahú segunda ohin no sei termina iha sesta iha komponente Navál Hera Dili.
Programa ne’e realiza tanba hetan kooperasaun servisu entre PDHJ, Ministériu Defeza, Unidade Asesória Diretu Ema-Nian hosi Organizasaun Naklibur Sira (ONU-sigla portugés) iha Timor-Leste no komponente Navál hahú kedas iha 2018.
Provedór Diretu Ema nian no Justisa Interinu, Miguel Pereira de Carvalho, iha ninia deskursu hatete treinamentu ne’e hodi hasa’e koñesementu no kapasidade membrus forsa sira nian, nune’e hametin no haforsa, respeita no protesaun diretu ema nian iha nasaun.
“F-FDTL sai hanesan forsa ida ne’ebé demokrátiku no responsavel, tanba ne’e iha dever hodi respeita no proteje ema hotu nia diretu ne’ebé konsagra ona iha Konstituisaun RDTL ne’ebe ita nia sidadaun tenke goza no diretu internasionál sira ne’ebé ita adopta liuhosi ratifikasaun hosi Parlamentu Nasionál”, dehan na.
Ho treinamentu ne’e sei apoiu membru F-FDTL sira atu sai profesionál liután bainhira halo knaar iha komunidade nia le’et.
“Ami sei halo mós ba forsa sira ne’ebé destaka iha nivel munisípiu no postu ne’ebé prezensa hosi F-FDTL sira”, afirma.
Iha biban hanesan, Komandante interinu komponente Navál, Kapitaun Tenente João de Fátima, koñesidu ho naran Buka Tuir, hatete direitu ema nian importante liu ba forsa sira.
“Ba militár sira maka agora dadauk iha ne’e, atu aprende durante semana ida ne’e hodi habelar ba ita boot sira nia maluk sira ne’ebé la tuir kona-ba direitu umanu nia lala’ok hanesan nu’udar forsa ba aplika iha misaun iha nasoens unidas, karik aban bainrua ba hala’o kna’ar iha ne’eba”, afirma.
Iha okaziaun komandante interinu ne’e suhere atu fó mós formasaun hanesan ba povu sira atu respeita direitu forsa sira nian bainhira hala’o kna’ar iha terenu, tanba akontese dala barak forsa sai vitíma hosi komunidade.
Jornalista: Agapito dos Santos
Editora: Rita Almeida
