Eskola Públika Ensinu Sekundáriu Nino Konis Santana (NKS) Gleno, munisípiu Ermera, ohin komemora loron mahein ho inaugurasaun jardín eskola ho estátua padrueiru eskola nian. Imajen Rita Almeida

GLENO, (TATOLI) – Eskola Públika Ensinu Sekundáriu Nino Konis Santana (NKS) Gleno, munisípiu Ermera, ohin komemora loron mahein ho inaugurasaun jardín inklui estátua padrueiru eskola nian.

Serimónia ne’e partisipa diretamente hosi autoridade lokál no entidade kompetente iha munisípiu ne’e no mós eis veteranu sira rejiaun IV, estudante, inan, aman, família veteranu sira no sira ne’ebé durante ne’e halo kontribuisaun hodi harii jardín ba padrueiru eskola.

Diretór Eskola Sekundáriu NKS Gleno, António da Costa. Imajen Rita Almeida

Diretór Eskola Sekundáriu NKS Gleno, António da Costa, ba Tatoli haktuir planu ne’e sira halo dezde 2017 hodi envolve veteranu sira iha Ermera.

“Durante diskusaun ami define buat rua; ida mak jardín no ida seluk mak monumentu”, afirma nia iha Gleno, ohin.

Hosi enkontru ne’e, nia dehan hamosu desizaun ida katak eskola ninia responsabilidade mak jardín, tanba monumentu hela ba kompeténsia Estadu nian.

Prosesu ne’e nia hatutan hetan apoiu hosi alunu sira, inan, aman, veteranu, profesór sira, funsionáriu tomak iha eskola refere, komunidade, emprezáriu balun no entidade seluk iha munisípiu ne’e.

Hosi kontribuisaun ne’e, komisaun organizadór konsege rekolla ajuda kuaze rihun rua ho ajudu sira seluk hanesan rai-henek, fatuk, simentu, no ekipamentu seluk ne’ebé ajuda prosesu konstrusaun jardín no mós estátua.

“Buat ida ne’ebé ha’u sente milagre mak bainhira hahú tau fatuk dahuluk ba jardín, ami ho orsamentu ida laiha, zero, ami buka debe, maibé ho esperansa katak dalan sei iha, nune’e la’o semana rua hetan mill ital, sorin balun selu debe no seluk kontinua ho konstrusaun”, nia haktuir ho orgullu ba esforsu sira hotu.

Ekipa Redasaun

HAKEREK NO HATÁN

Please enter your comment!
Please enter your name here