Renato da Costa

Antes  hau hahu’u ba asuntu kona-ba konseitu aplikasaun sistema  dijitalizasaun no konverjênsia  mídia nian, hau inisia ho  introdusaun  dahuluk kona-ba teknologia  informasaun no komunikasaun. Katak eziste aspeitu balun ne’ebé konsideradu pasparte evolusaun hosi teknologia  komunikasaun nian mak, primeiru, teknologia  komunikasaun nu’udar ferramenta.Segundu, teknologia  komunikasaun mosu hosi estrutura ekonômika, social no polítika. Terseiru,teknologia  komunikasaun nu’udar parte hosi transformasaun intereses ekonômikas, sociais no polítikas hosi grupu implementador.

Depois rona katak Timor Leste ho Governu China asina akordu konaba aplikasaun sistema DIJITALIZASAUN ba RTTL.EP iha loron 5 Marsu 2019, hamosu hau nia preokupasoens konaba implementasaun politika ne’e. Hau laiha intensaun atu halo intervensaun hodi la aseita politika ne’e. Frankamente buat hirak ne’e hotu nu’udar evolusaun iha prosesu tomak hodi dignifika nasaun ou estadu nia soberanu hanesan mos rai seluk ne’ebe moris iha mileniu teknolojia ne’e. Hau preokupa mak, seraque Governu iha tiha ona Lei hodi regula ou kontrola tipu servisu refere? Seraque Governu iha ona roteiru (road map) kona-ba aplikasaun politika ne’e? Sa medidas mak Governu sei halo kuandu mosu infrasaun hosi tipu servisu ne’e? Tanbasa mak ita lahalo konsulta publiku hodi involve mos peritus hosi parte eksternal hodi prepara kondisaun tuir  kondisaun terenu Timor Leste nian? Oinsa ita bele garante katak aplikasaun ida ne’e sei fo benefisia ba povu Timor Leste?

Ita hosu aseita katak, nasaun hotu ohin loron   sedu ou mais tarde, sei lases hosi processo  dijitalizasaun ne’e rasik. Ho nune’e  questão principal kona-ba dijitalizasaun laos deit kona-ba oinsa atu konstrui acesso dijital ho kondisaun ekipamentus mais modernu  deit, maibe oinsa ita desenvolve estratégias ho matadalan ne’ebé propriu hodi jere impaktu hosi aplikasaun dijitalizasaun ne’ebe sei afeta ba setor  ekonomia, politika, seguransa no mos vida social  sosiadade nian ho kuidadu hodi lahamosu obstaklu iha futuru.

Iha Fórum Ekonômiku Mundial  tinan  2013 ne’ebe hahu’u hosi loron 23—27 Janeiro  2013 iha Davos-Klosters, Suíça, tinan neen liu ba  koloka tiha ona  dijital wildfires nu’udar riskos globais ne’ebe halo  mundo  sei moris ho hiperkonektado  (hyperconnected world)  tanba deit  desenvolvimento hosi teknologia  informasaun no komunikasaun ne’e  sei domina deit hosi parte ida.

Ho nune’e bazeia ba  pensamentu kona-ba konseitu aplikasaun politika dijitalizasaun ein jeral sempre avansa ho prinsípiu DIVERSIDADE PROPRIEDADE no DIVERSIDADE KONTEÚDU ba bem-estar ninia sidadaun. Signifika katak kuandu ita tama iha faze aplikasaun era dijitalizasaun, necessáriu tebes atu ita iha LEIS ho nia regulamentos sira seluk ne’ebé benefisia partes hotu hosi sosiadade ne’e antes ita hahu’u obra ne’e. Ho nune’e demokratizasaun transmisaun bele akontese iha iklima ho maneira saudável no ajuda duni harii sosiadade ida ne’ebé moris ho informasaun ne’ebé los no klara. Tanba wainhira atu aplika politika implementasaun dijitalizasaun requere tebes várias preparasaun hanesan equipamentos, pessoal téknikus, programas transmisaun, leis no regulamentu konaba MODELU dijitalizasaun ho nia padraun tuir kondisoens ita nia nasaun.

Tanba ne’e uza biban ne’e katak ba Timor Leste antes aplika sistema dijitalizasaun, ita tenke iha roteiro ho ninia programa estratégiku ho tipu longo prazu ne’ebé sei inklui buat barak hanesan ;

  1. Padrões konaba modelu teknologias dijitais ne’ebé mak ita atu uza
  2. Regulamentu ho ninia estruturas no prosedimentos  ezekusaun no aplikasaun
  3. Durasaun  tempu aplikasaun hosi pais apoiantes
  4. Lei konaba Protesaun públika wainhira aplika sistema refere
  5. Estruturas konaba implementasaun migrasaun  hosi analóg ba dijital  ho ninia substâncias reguladoras ne’ebe  presiza  antes termina migrasaun analóg ba dijital

Bazeia ba hanoin balun hanesan fo sai tiha ona, Governu Timor Leste presiza inisia  ho  roteiro kona-ba prezensa  aplikasaun sistema dijitalizasaun liuhosi mapeamentu ne’ebe klaru. Hodi nune’e ita bele evita desequilíbriu kona-ba utilizasaun sistema dijitalizasaun nee iha futuru.

Iha parte seluk, polítika konaba  regulatória  tenke fo resposta ba dezafius iha futuru. Pelo menos wainhira aplika politika ne’e, Governu iha ona matadalan propriu hodi evita dezafiu iha qualquer  governasaun hodi bele evita  abuzu de utilizasaun sistema teknolojia komunikasaun no informasaun wainhira realiza modelu dijitalizasaun ba Timor Leste.

Tanba aplikasaun dijitalizasaun ne’e bele sai momentu hodi organiza tipu de teknologia nacional hodi lao tuir duni ritmu no kapasidade ita nia emar sira iha terenu tuir manuais politika Governu Timor Leste nian. Tanba ne’e, socializasaun hosi planu dijitalizasaun no mos modalidade hodi termina transmisoens analóg tenke espalha ona ba povu tomak. Hodi nune’e ita nia komunidade totalmente preparada duni wainhira períodu desligamentu (CUT OFF) transmisoens TV analóg akontese duni.

Referensia ou komparasaun badak hosi nasaun vizinhu hanesan Indonesia no Singapura wainhira sira inisia programa ne’e, sira halao liuhosi meius oin oin. Hahu’u 2004, antes halo Migrasaun Televizaun no Rádio hosi Analóg ba Dijital. Governu Indonesia liuhosi ministeriu relevantes halo estudus barak hodi analiza implementasaun transmisaun TV dijital ne’e. Hanesan halao  semináriu ne’ebé envolve especialistas hosi área TV dijital hosi  nasaun  seluk nu’udar komparasaun antes aplika sistema DIJITAL ne’e. Inklui mos teste ba transmissaun TV dijital ne’e iha meadu 2006 liuhosi kanais 34 UHF ho nia padrões DVB-T no kanais 27 UHF ho nia padrão T-DMB.

Hosi rezultados teste ne’e komprovadu katak teknologia DVB-T bele multiplexa vários programas . Seis programas transmisaun bele inserta simultaneamente iha kanal ida deit ho ninia largura banda 8MHz, ho qualidade ne’ebé mak diak tebes. Finalmente, depois liuhosi estudos sientífikus, konsultas públikas no teste ne’ebé mak realiza, Indonesia hamosu desizaun ho ninia padrões uza transmissão dijital, ne’ebé uza iha região Europeia, liuhosi Regulamento Ministro Komunikasaun e Informasaun nº. 07 / P / M.KOMINFO / 3/2007, Sofyan Djalil, iha 21 Março de 2007, Kona-ba Padrões Dijitais Radiodifusão Terrestre ba Televisão Não Móvel iha Indonésia. Nune’e mos Governu Indoensia deklara kedas hodi estipula DVB-T (Dijital Video Broadcasting – Terrestrial) nu’udar padrões transmissão TV dijital iha Indonésia.

Hosi Singapura, pais ne’ebe avansadu tebes iha teknolojia, foin bele halo transformasaun hosi sistema analog ba dijital iha loron 1 Janeiru 2019. Maibe antes to iha faze ne’e, LEIS no regulamentu barak mak sira produs ona hanesan; Broadcasting act, the Electronic Transaction Act, Films Act, Newspaper and Printing Presses Act, Personal data Protection Act,Postal Services Act, Public Entertainments Act, Telecomunication Act inklui Undesirable Publication Act.

Lei konaba broadcasting Act ne’e lidera hosi orgaun ida ho naran SBA ( Singapore Broadcasting Authority) ne’ebe inisia iha 1 Outubru 1994. SBA desempena papel sentral konaba regulasaun no promosaun industria transmisaun iha Singapura no hahu’u iha 1 Janeiru 2003 transforma tiha ba kuadru foun  ho naran  Autoridade Dezenvolvimentu Media nian – Media Development Authority (MDA) ne’ebe ohin loron Singapura hanaran IMDA ( Infocomm Media Development Authority)

Karik ba Timor Leste ita hare atu hanesan ANC (Autoridade Nasional Komunikasaun). Maibe saida mak to ohin loron ita hetan hosi prezensa ANC ne’e?. Ate data, ANC  ne’ebe tuir lolos halao servisu teknika hodi hare prosesu aplikasaun ba servisu hirak ne’e, seidauk iha seriadade atu bele sai autoridade teknika ba servisu komunikasaun ne’ebe sai piaun iha area teknolojia no informasaun nian.

Sidadaun ou públiku ne’ebe hatene uitoan mekanismu servisu programa dijitalizasaun hatene ho diak katakak konvergência  ne’e sei mosu ho formas dadus hosi  mídia konvencional hosi  analóg sei  transforma ho  forma  dijital. Ho nune’e ita bele hakerek no lee ho unidades liuhosi binary digit  (dígitus binárius).

Tuir mai informasoens hirak ne’ebe ita haruka tuir sistema ho formatu dijital, ninia konvergência ba kriasaun ho ninia aplikasaun ne’ebé sei hamosu  funsaun audiovisuais ne’ebe ikus mai ita hanaran hibridasaun ou unifikasaun. Buat hirak ne’e mak ita kuandu akompanha akontese hela ohin loron oinsa TV sai ida deit ho  internet. Nune’e mos wainhira ita bele asesu  internet liuhosi TV simultaneamente.

Buat hotu ne’eb’e ita aprende katak qualquer apoiu hosi pais vizinhu maske kiik no uitoan sempre iha ninia konsekuensia ba futuru (iha lian Indonesia karik dehan “Tidak ada yang gratis – laiha ida mak gratuitu). Konsekuensia hirak ne’e ikus mai bele afeta ba dignidade nasaun no povu rai doben ne’e, wainhira ita laiha modelu ou konseitu ne’ebe klaru hodi prepara aslera prosesu ne’e tomak.

Ikus liu, dezenvolvimentu setor teknologia iha  aspetu positivu no  negativu. Antesipasaun ba parte  negativus ita labele konsidera nu’udar buat simplis. Hodi nune’e  konvergência ne’e bele benefisia ba interese estadu no povu hotu nian. Iha parte ne’e  wainhira koalia kona-ba regras, no prosidementus iha domínio polítiku,  governu tenke iha ona regulamentus no leis ne’ebe abrangentes no propriu kona-ba aplikasaun dijitalizasaun ne’e. Regulamentu ne’e bele sai matadalan hodi proteja  povo no  nasaun ida ne’e ninia kredibilidade wainhira sistema ne’e ho naran DIJITALIZASAUN nee realiza duni.

Ho ordem mak ita manan funu ne’e. Katak hau preokupa tebes lei ba aplikasaun politika ne’e. Se ita seidauk iha lei no regulamentu ne’ebe koresponde ba servisu  DIGITALIZASAUN nian, Konsellu Ministru iha obrigasoens atu hare hikas fali politika ne’e.

HAKEREK NO HATÁN

Please enter your comment!
Please enter your name here