Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, (TATOLI) – Prezidente Parlamentu Nasionál (PPN), Arão Noe, felisita feto Timor-Leste relasiona ho komemorasaun loron feto mundiál ne’ebé kada tinan sempre komemora iha loron 8 marsu.

“Ha’u hato’o parabéns ba feto Timor-Leste sira, liu-liu sira ne’ebé partisipa iha komemorasaun ida ne’e no hein katak iha komemorasaun ida ne’e feto bele partisipa ativu liután iha polítika no dezenvolvimentu, atu nune’e igualdade jéneru ne’e bele sai realidade”, tenik PPN ba jornalista sira iha resintu uma fukun.

Tuir lider orgaun lejislativa ne’e dezenvolvimentu entre feto no mane laiha diferénsia, maibé dalaruma iha prátika uitoan kona-ba kultura no tradisaun mak sei iha diferénsia, más ho tempu sei lakon. 

Maske nune’e nia husu feto tenke luta nafatin atu halakon disigualdade.

“Dezafíu ne’ebé durante ne’e feto sira hasoru mak kultura no tradisaun rasik mak tau feto númeru 2, maibé agora komesa mudansa maka’as ona. Hein katak kultura ne’e sei menus. Ita nia kultura iha Timor iha parte balun feto valor aas liu fali mane, parte balun mak lae”, katak.

Nia fó ezemplu, iha lei ba rai ne’ebé define ona, tuir titulár bens no moveis agora dadauk ne’e sei kaben nain ida iha uma no ba rejistu, tenke tau rai ne’e feen-laen nia naran, labele tau de’it laen nian.

“Ida ne’e mak ita komesa prátika ona iha lei rai, hodi bele asegura direitu hanesan. Nune’e sira nain rua mak servisu hodi hola rai ne’e tau tia mane nia naran, hafoin bainhira soe malu feto laiha buat ida buat ida”, dehan tan.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here