Ministru Justisa, Manuel Cárceres da Costa. Imajen/ Egas Cristovão

DÍLI,(TATOLI)Primeiru-Ministru (PM), Taur Matan Ruak, indika ona Ministériu Justisa (MJ) lidera ekipa serbisu atu halo levantamentu dadus kona-ba patrimóniu estadu, liuliu karreta sira estadu nian.

Ekipa koordenasaun ba serbisu reforma jestaun patrimóniu estadu ne’e, kompostu husi Ministru Reforma Lejislativa no asuntu Parlamentares, Fidelis Manuel Leite Magalhães, Ministra Finansas Interina, Sara Lobo Brités, Ministru Justisa, Manuel Cárceres da Costa ho Ministru Administrasaun Estatal Interinu, Abílio José Caetano.

 “Ohin iha ona akordu ida katak ekipa tékniku ida husi ministériu finansas atu hahú  halo levantamentu dadus kona-ba  bens movies foku liuliu ba karreta estadu nian”, informa Ministru Manuel Cárceres ba Jornalista sira, ohin, iha Palasiu   Governu.

Ministériu Finansas rejista estadu iha ona karreta hamutuk  4.197, husi  numéru ne’e  3.693 iha kondisaun diak no 504 kondisaun a’at hela.

“Intensaun atu hetán dadus loos kona-ba viaturás   estadu nian. Nune’e, sei halo bazé dadus ida hodi kontrola ba viaturas estadu nian para bele maxímina utilizasaun viaturas sira ne’e ba Estadu nia diak no estadu nia nesesidades”,  Manuel Cárceres afirma tan.

Husi viatura hirak ne’e, maioria governu sosa ho osan estadu no restu hetan tulun husi doador   internasionál sira.

Hataan ba jornalista kona-ba levantamentu dadus bens imovéis hanesan rai no uma estadu, Ministru Justisa dehan, tempu besik sei públika baze dadus liuhusi sítiu ministériu nian ba públiku kona-ba rai no uma estadu hira maka sidadaun okupa no prosesu selu arrendamentu ba kofre estadu.

“Ministériu Justisa prepara ona base  dadus, ita hein tan, fulan tolu ka ha’at ne’e kompletu ona”, hateten Ministru Manuel Cárceres.

Nia hatete, sidadaun sira ne’ebé okupa uma no aluga rai estadu kada fulan tenke selu arendamentu ba kofre estadu tuir valór determinante husi governu liuhusi Kaixa Gerál Depósito ka Banco Nacionál Ultramarinho (BNU).

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here