Sekretáriu Estadu Formasaun Profisonál no Empregu (SEFOPE), Julião da Silva. Foto/SEFOPE.

DILI, (TATOLI) – Sekretáriu Estadu Formasaun Profisionál no Empregu (SEFOPE), Julião da Silva, informa Kanada kompromete atu apoia Timor-Leste (TL) liuhusi programa rua importante mak iha área tékniku vokasionál nomós haruka traballadór timoroan atu bá serbisu iha nasaun ne’e.

Julião afirma ida ne’e hafoin soru-mutu dahuluk ho embaixadór Kanadá, Peter Mac Arthur, ne’ebé maka hakarak hatene di’ak liután kondisaun Timor-Leste nian liuliu sentru formasaun no eskola tékniku vokasionál ne’e oinsá.

“Sira sei buka hatene di’ak liután para nune’e bainhira iha nesesidade merkadu ou indústria sira iha, sira hatene ona Timor-Leste bele  envolve, maibé sira ohin hatete porsentu 100 sira hakarak apoia Timor-Leste”, Julião relata iha Kaikoli, ohin.

Aleinde ne’e embaixadór Kanada sei informa mós ba Banku Dezenvolvimentu Aziátiku (ADB, sigla iha inglés) tanba iha esperiénsia barak kona-ba formasaun tékniku vokasionál no husu atubele halo mós iha Timor-Leste.

“Depois sei haree tan kondisaun sira seluk para haruka ita-nia timoroan sira bá serbisu iha Kanadá iha parte rua skilled (kualifikadu) nian nomós ba unskilled (lakualifikadu)”.

Kona-ba preparasaun atu haruka timoraon sira ne’e, Julião dehan ida ne’e sei iha etapa diskusaun tanba Kanada sei buka atu hatene uluk kondisaun Timór nian no nia preparasaun oinsá? Nune’e bainhira Timor-Leste envolve ona iha foreign worker program (programa traballadór ba estranjeiru) ne’e, pelumenus sira hatene ona kapasidade saida maka Timor-Leste iha.

“Nune’e sira bele fasilita merkadu ba ita”, Julião dehan. Atubele aproveita oportunidade ne’e, SEFOPE husu ba joven sira atu hadook án husi violénsia no hakbesik án ba sentru formasaun sira ne’ebé besik no tuir kursu, eskola para aumenta koñesimentu nune’e bele kompete maske bá serbisu iha ema nia rai, maibé iha abilidade uitoan para bele hetan oportunidade serbisu.

Embaixadór Kanada, Peter Mac Arthur, hatete iha soru-mutu ne’e ko’alia kona-ba komparasaun polítika edukasaun naun-kualifikada no posibilidade ba empregu no importante liu maka atu hatene sobre Timor-Leste.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here