Reitor Universidade Nasional Timor Leste, Francisco Miguel Martins. Imajen: Egas Cristovao

DÍLI, (TATOLI)-Universidade lima (5) husi Timor-Leste, Indonézia ho Australia, halo hela peskiza trilaterál hodi haree kona-ba jestaun bee iha fronteira rai maran Timor-Leste (TL) ho Republika Indonézia (RI).

Universidade hirak ne’e, kompostu husi Universidade Nasionál Timor Lorosa’e (UNTL),  Universidade Charles Darwin-Australia,  Universitas Undana, Kupang, Universitas Mataram-Lombok ho Universitas Haloyo-Mataram, Indonézia.

“Iha fronteira tanba saida? Fronteira terestre, ita baliza ho Timór Osidentál, parte Indonézia, Timór Orientál ka Timor-Leste ne’e, país soberanu Repúblika Demokrátika Timor-Leste. Entaun, ita tau interese hamutuk iha peskiza ida ne’e tanba fornesimentu água para vida ne’e fontes husi ita nian mak barak liu duke fontes husi Indonézia, iha ita-nia fronteira”, hatan Reitór UNTL, Francisco Miguel Martins ba TATOLI, ohin, iha Kampus Liceu-UNTL.

Profesór universitáriu ne’e esplika katak, Timor-Leste nia fontes bee nian iha fronteira entre Timor-Leste ho Indonézia ne’e iha fontes boot tolu hanean Inchul, Ilbula no Ilchulba. Fontes bee tolu ne’e hotu lokaliza iha Munisípiu Bobonaro.

Fontes bee tolu ne’ebé lokaliza iha Munisípiu Bobonaro ne’e mak kontribui mós ba sidadaun Indonézia sira, iha parte fronteira ho Timor-Leste hodi hala’o sira-nia atividade agrikultura hanesan halo natar.

“Fornesimentu água ne’e 80% husi ita-nian no husi sira nian 20%, ne’e tempu udan mak fornese. Kuandu udan maran, rai maran, entaun sira labele ona. Ita hala’o hela peskiza ida ne’e oinsa mak rehabilita fila fali fontes água sira ne’e para labele degradasaun menus ba bebeik maibé tenke aumente tan”, esplika  Francisco Miguel Martins.

Reitór rasik mós partisipa iha asinatura MoU (Memorandum of Understanding) entre Kementerian Linkungan Hidup Indonézia nian nomós  Diretór Jerál Meiu Ambiente TL ne’ebé hala’o iha Atambua, foin lalais ne’e. Partisipasaun UNTL nian ne’e tanba UNTL  nu’udar sentru ba peskiza ida ne’e.

“UNTL nia papel iha ne’e boot tebes. Agora dadaun Fakuldade Agrikultura UNTL mak asume hela prosesu ida ne’e i ha’u mós akompaña, superviziona bebeik hodi bele sustenta atividade peskiza ida ne’e ho didi’ak no loloos”, tenik Francisco Miguel Martins.

Fundu ba atividade peskiza ne’e síjilu. Maske nune’e, reitór ensinu superiór públika, Francisco Miguel Martins esklarese katak, fundu universidade nian ne’e, alokadu tinan-tinan iha Planu Asaun Anuál,  Sentru Peskiza no Investigasaun Sientífika.

Nia hatutan,  iha triletarál ne’e rasik iha orsamentu husi Charles Darwin University, Undana, Kupang nomós husi governu Indonézia no governu tenke tau orsamentu ba iha ne’ebá. Maibé, universidade  tenke iha rasik nia fundu ruma para sustenta.

“Purezemplu, husi estadu nian seidauk to’o mai, ita bele avansa dadaun ho ita-nia fundu rasik ne’ebé mak ita tau iha ita-nia Planu Asaun Anuál, Orsamentu Jerál Estadu ne’e para sustenta ita-nia atividade hanesan ne’e hodi halo dinamizasaun, kriasaun, inovasaun ba dezenvolvimentu nasionál”, hateten Francisco Miguel Martins.

Peskiza trilaterál ne’e nu’udar peskiza ida ne’ebé estabelesimentu ensinu superiór estatál ne’e hala’o iha sira-nia atividade akadémika no sientífika haktuir ba vizaun, misaun no valór universidade nian.

Jornalista: Rafy Belo

Editór: Francisco Simões

HAKEREK NO HATÁN

Please enter your comment!
Please enter your name here