Kristu Luirai. Imajen/ Turizmu Timor-Leste

DILI, (TATOLI) – Ministériu Turizmu, Komérsiu no Indústria (MTKI) liuhusi programa dezenvolvimentu sítiu turístiku iha tinan ne’e aloka rihun $400 hodi halo reabilitasaun ba fatin turizmu sira hanesan Kristu Rei, Ramelau, Marobo no João Paulo II.

Diretór Jerál Ministériu Turizmu, Komérsiu no Indústria (MTKI), José Filipe Dias Quintas, hatete orsamentu ne’e prevee kedan iha momentu diskusaun orsamentál 2019.

“Primeiru-Ministru mós apoia loos, oinsá halo reabilitasaun tanba ita haree sítiu balun agora daudaun ne’e abandonadu. Ko’alia kona-ba jestaun, reabilitasaun, ita mós keta haluha orsamentu”, katak nia iha Sentru Konvensaun Dili, ohin.

Nia dehan ho verba ne’e, sei servisu hamutuk ho ministériu relevante, hanesan koordena ho munisípiu Dili hodi halo jestaun ba sítiu Kristu Rei.

Enkuantu kona-ba progresu ezekusaun orsamentu ba reabilitasaun sítiu turistiku sira ne’e, Quintas dehan tanba sistema iha Ministériu Finansa (MF) seidauk loke ho normál, maibé tékniku sira komesa halo ona koordenasaun.

“Se ita ko’alia kona-ba sítiu turístiku iha Dili, ami-nia tékniku sira komesa koordena ona ho Munisípiu Dili para hahú reabiltasaun iha sítiu ne’e rasik”.

Tanba ne’e bainhira sistema iha MF normál ona maka tékniku sira sei tun ba munisípiu liuliu iha Ramelau no Marobo para hahú ona levantamentu dadus para komesa hadi’a ona fatin hirak ne’e.

Iha soru-mutu entre Primeiru-Ministru, Taur Matan Ruak, ho Diretór Jerál Administrasaun Finansa Komponente Turizmu, Augusto Manuel de Oliveira Carvalho, foin lalais ne’e orienta MTKI atu dezenvolve mós sítiu Maubara nune’e bele atrai turista sira no haki’ak Lafahek.

“Iha 2020 Ministériu Turizmu iha programa prioridade rua maka atu dezenvolve sítiu Maubara no haki’ak Lafahek. Ida ne’e orientasaun husi Primeiru-Ministru rasik”, Augusto hatete foin lalais ne’e (12/2)  iha Palásiu Governu hafoin soru-mutu refere.

Augusto akresenta planu 2020, Xefe Governu fó rekomedasaun katak MTKI tenke prepara planu didi’ak, nune’e bele tau orsamentu ne’ebé adekuada ba dezenvolvimentu iha área turizmu nian no bele iha vantajen direta ba povu.

Lee mós : http://www.tatoli.tl/2019/02/primeiru-ministru-orienta-dezenvolve-sitiu-maubara/?fbclid=IwAR3Lu3Lp_ePVMQfis3O9CF7yq3oy3mFEYs6v5jZQeLWzixmyhY19u2s7uoc

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here