Primeiru-Ministru, Taur Matan Ruak, hafoin sorumutu ho Prezidente Repúblika, Francisco Guterres Lú Olo, iha Palásiu Prezidensiál Bairru Pité. Imajen Egas Cristovão

DILI, (TATOLI) – Primeiru-Munistru, Taur Matan Ruak, hateten dadaun ne’e Konsellu Ministru seidauk diskute mandatu Prezidente Autoridade Rejiaun Autónoma Espesiál Oekuse Ambenu (RAEOA), Marí Alkatiri, ne’ebé sei termina iha juñu tinan ne’e.

Tuir Xefe Governu mandatu Prezidente Autoridade RAEOA ne’e naturalmente Governu maka propoin, maibé Prezidente Repúblika maka nomea.

“Ne’e asuntu ida ne’ebé maka liga ba orgaun rua. Agora ha’u seidauk iha opiniaun formuladu para avansa, maibé naturalmente iha tempu badak ami sei ko’alia ida ne’e”, Xefe Governu ba jornalista sira iha Palásiu Prezidente Nicolau Lobato, Bairru Pité, kinta ne’e hafoin sorumutu ho Xefe Estadu.

Entretantu kona-ba ministériu balun hahú halo mudansa ba kargu xefia sira, Taur hatán ministériu ida-idak iha nia regra atu troka pozisaun ruma hanesan diretór ka diretór jerál iha kada ministériu.

“Ita iha regra. Asuntu interna ministériu ida-idak nian dezde la viola regra no la viola lei, sira iha poder tomak para halo mudansa ne’ebé sira sente katak tenke halo”, afirma.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here