Illa Jako. Foto espesiál.

DILI, (TATOLI)-Ánimu turista lokál ho internasionál sira ba fatin turismu sira iha territóriu Timor-Leste bo’ot tebes, maibé kondisaun infraestrutura mak sei sai dezafiu.

Sítiu turístiku Illa Jako sai mós hanesan destinasaun favoritu ba turista sira, maibé tuir Diretór Jerál Turizmu iha Ministériu Turizmu, Komérsiu no Indústria (MTKI), José Filipe Dias Quintas, katak, dezafiu ne’ebé turista sira sempre preokupa mak kondisaun asesu ba infraestrutura.

Dezafiu seluk, José Quintas hatutan, asesu ba bee moos, eletrisidade ho rede telekomunikasaun nafatin sai hanesan preokupasaun. “Ita presiza serbisu hamutuk ho ministériu relevante atu bele buka solusaun hodi responde dezafiu sira ba asesu ita nia sítiu turístiku iha rai laran”, hateten Diretór Jeral Turizmu, José Filipe Dias Quintas, ohin,  iha Sentru Konvensaun Dili.

Baze de dadus MTKI nian kontempla katak, Illa Jako mós hanesan área prioridade iha dezenvolvimentu sítiu turístiku, maibé tanba orsamentu ne’ebé aloka ba ministeriu mak sei limitadu atu konserva halo didiak no halo furak liu tan.

José Dias Quintas dehan, munisipiu ida-idak iha nia íkon turizmu rasik, hanesan mós ho Illa Jako iha Munisipiu Lautem. Tanba ne’e, MTKI haree katak, ba futuru sei prevee orsamentu ba sítiu refere iha tinan oin hodi bele tau prioridade ba fatin ne’e tanba Illa Jako la’ós haree de’it ba nia beleza, maibé mós kona-ba fatin istóriku no fatin ne’ebé sai área protejida.

“Ema kuandu mai Timór sempre hakarak vizita Jako, maibé dezafiu ne’ebé hasoru maka infraestrutura”, José Quintas afirma tan.

Jornalista: Maria Auxiliadora

Editór: Francisco Simões

HAKEREK NO HATÁN

Please enter your comment!
Please enter your name here