Vitima nain 2 husi Masakre Liquiçá tuur haku'ak malu iha mate sira le'et.

DILI (TATOLI) – Sei freska hela iha Timoroan hotu nia memoria kona-ba masakre negra iha tinan 1999. Masakre ne’ebé mos sai hanesan mehi át ida ba Timoroan hotu mak Masakre Liquiçá iha loron 6 fulan Abril 1999.

Iha tinan  20 liu ba, Liquiçá oan sira; husi ferik, katuas, jovens no labarik sira, haklalak, luntu’ur ho matan-been simu sofrementu oioin  iha mate sira leet tanba deit “Ukun  Rasik-án”.

Milísia pro-Indonezia husi grupu Besi Merah Putih (BMP) hamutuk ho militar no polisía Indonezia nian asalta Igreja Liquiçá hodi oho ema nain 200 ne’ebé husu protesaun hodi subar  iha igreja laran.

Atu hanoin hikas masakre negra ne’e, Liquiçá oan sira organiza malu ona hodi forma komisaun organizadora ba komemorasaun tinan 20 Masakre Liquiçá. Nune’e, ohin, sira hakat mai to’o Gabinete Prezidente Parlamentu National nian hodi konvida Prezidente Parlamentu Nasionál, Arão Noe de Jesus, atu bele sai oradór prinsipál iha semináriu komemorasaun Masakre Liquiçá ne’e.

“Ohin ekipa ida reprezenta komisaun organizadora atu halo semináriu ba komemorasaun tinan 20 Masakre Liquiçá no sira hakarak konvida hau atu halo hato’o mensajen ruma”, informa  Prezidente PN, Arão Noe de Jesus, ba jornalista sira iha resintu Parlamentu Nasionál (PN).

Prezidente PN, Arão Noe de Jesus, apresia ho inisiativa no programa komemorasaun Masakre Liquiça ba da-20 hodi bele fó hanoin ba estadu tomak atu mós fó atensaun ba saudozu sira, inklui krime sira kontra direitu umanu nian.

Parte seluk Prezidente Assosiasaun ba Apóiu Dezenvolvimentu Liquiçá, Antoninho Pires ne’ebé hanesan mós komisaun Organizadora hateten, hanesan Liquiçá oan husu Prezidente Parlamentu Nasionál nia disponibilidade para  sai oradór iha  semináriu ne’ebé sei hala’o loron tolu komemorasaun Masakre Liquiçá nian iha loron  6 fulan Abril, tinan ne’e.

Semináriu national ne’e sei hala’o durante loron tolu nia laran no sei konvida orgaun soberanu sira, fundadór nasaun nian, sosiedade sivíl no arte hotu ne’ebé iha relevansia ba assuntu ne’e.

“Assuntu importante ne’ebé ami sei koalia mak masakre, direitu no justisa, liu-liu ba povu Timor ne’ebé durante ne’e hetan tortura. Ami komemora loron ida ne’e atu bele fanun fali komponente tomak, atu oinsá bele haree ba vítima no komponente hotu, la’os deit haree ba Masakre Liquiçá nian”, hateten Antoninho Pires.

Jornalista: Julia Chatarina

Editór: Francisco Simões

HAKEREK NO HATÁN

Please enter your comment!
Please enter your name here