Governu liuhusi Sekretariu Estadu Komunikasaun Sosiál (SEKOMS) ho governu Xina liuhosi embaixadór ba TL, Xiao Jiaguo, ohin ofisialmente asina akordu implementasaun sistema dijitál TDTBS iha sala Diplomátiku Ministériu Negósiu Estranjeiru no Kooperasaun (MNEK), Praia dos Coqueiros. Imajen António Gonçalves

DILI, (TATOLI) – Governu liuhusi Sekretariu Estadu Komunikasaun Sosiál (SEKOMS) ho Xina, ohin ofisialmente asina akordu implementasaun sistema dijitál TDTBS (Digital Terrestrial Television Broadcasting System) ba mídia públiku Radiu no Televizaun Timor-Leste (RTTL-EP), iha sala Diplomátiku Ministériu Negósiu Estranjeiru no Kooperasaun (MNEK), Praia dos Coqueiros.

“Hahú ohin ba oin ekipa sira husi Xina serbisu sei halo implementasaun ba sistema dijitalizasaun ba RTTL ne’ebé ohin ne’e momentu importante, tanba ita konsege asina akordu”, katak  Sekretáriu Estadu Komunikasaun Sosiál, Merício Juvenal dos Reis Akara, ba jornalista sira hafoin asina akordu.

Ho momentu ne’e nia espera tempu badak bele akontese mudansa iha RTTL,EP ho teknolojia ba transmisaun no simu imajen ho lian liuhosi sinál dijitál.

Durante diskursu governante ne’e hatete Xina sei responsável ba dezeñu no konseitu ba projetu ne’e. Enkuantu governu Timor-Leste sei estabelese implementasaun no ekipa jestaun ida atu fornese ekipa treinamentu ida durante instalasaun no teste ba mekanizmu sira.

“Osan ba projetu ne’e kuaze RMB yuan 37.000,00 ($5,522.14 kurs ohin nian)”,  relata sekretáriu estadu perante públiku.

Akara hatutan governu liuhusi SEKOMS sei aplika tarefa alfandegáriu, impostu intermediáriu sira no taxa fiskál sira seluk mak hanesan taxa ba produtu no servisu nesesáriu ba ezekusaun projetu ne’e.

“Governu konfia katak projetu ne’e sei hetan rezultadu pozitivu, tanba ne’e ho laran ksolok asina akordu ne’e, nune’e bele kontribui ba dezenvolvimentu komunikasaun sosiál iha Timor-Leste”, afirma.

Iha fatin hanesan, embaixadór Xina ba Timor-Leste, Xiao Jiaguo, ba jornalista sira hatudu ninia ksolok tanba bele kolabora ho governu iha aspetu implementasaun sistema dijitál TDTBS ne’e.

“Espera katak hafoin implementa sistema dijitál ne’e, povu Timor-Leste bele asiste programa televizaun ho alta definisaun”, espresa.

Nia realsa momentu ne’e importante tebes, tanba sei iha transmisaun programa ho koloridu.

Embaixadór ne’e mós haktuir Xiña nu’udar nasaun boot ida ho kultura oioin hanesan Timor-Leste, tanba ne’e liuhusi programa televizivu sira povu no nasaun rua bele aprende ba malu.

“Ha’u hanoin iha futuru, nasaun rua bele koopera atu aprende ba malu kona-ba kultura ne’ebé mak diferente hodi enrikese ita-nia amizade”, espera Xiao Jiaguo.

Partisipa iha serimónia ne’e Sekretáriu Estadu Formasaun Profisionál no Empregu (SEFOPE), Julião da Silva, Sekretáriu Estadu Arte no Kultura (SEAK), Teofílio Caldas, Prezidente RTTL-EP, Francisco da Silva Gari, autoridade timoroan seluk inklui funsionáriu sira balun.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here