Prezidente KFP, Faustino Cardoso. Imajen Egas Cristovão

DILI, (TATOLI) – Prezidente Komisaun Funsaun Públika (KFP), Faustino Cardoso, hatete sei hadi’a polítika atu aumenta involvimentu ema ho kondisaun defisiénsia iha administrasaun públika hodi serbí Estadu no povu hodi realiza polítika inkluzaun iha servisu públiku.

Tuir dadus sensu 2015 rejista ema ho defisiénsia maka servisu iha administrasaun públika hamutuk feto ho mane 1.416 maibé tuir dadus KFP 97, servisu privadu 3.430 no kria koperativa halo negosiu hamutuk feto 59.

KFP organiza seminaríu loron ida kona-ba defisiénsia iha administrasaun públika ne’ebé hala’o iha otél Timor, ohin. Imajen Egas Cristovão

“Ba oin komisaun funsaun públika sei hamutuk ho instituisaun sira, liuliu MSSI (Ministériu Solidaridade Sosiál no Inkluzaun), Ministériu Saúde, Ministériu Edukasaun, Ministériu Obra Públika bainhira halo konstrusaun fíziku tenke sensivel ba ema ho defisiénsia”, katak nia iha seminaríu loron ida kona-ba defisiénsia iha administrasaun públika ne’ebé organiza hosi KFP, iha otél Timor.

Tuir nia formasaun no treinamentu, lei balun izola partisipasaun ema ho defisiénsia sira. “Ba oin presiza revee lei no regulamentu sira hodi implementa prinsípiu inkluzaun ho partisipasaun ema ho defisiénsia no termu sira ne’ebé lei uza hanesan dekretu lei ida kona-ba invalides no aleijadu”, tenik Faustino.

Polítika inkluzaun no partisipasaun ema ho defisiénsia iha servisu públiku importante, tanba ne’e KFP ho ministériu relevante presiza atu servisu hamutuk hodi implementa.

Semináriu nasionál kona-ba defisiénsia iha administrasaun públika ne’e hetan apoiu orsamentu hosi embaixada Austrália iha Timor-Leste.

Ratifika Konvensaun Direitu Ema Ho Defisiénsia

Okaziaun ne’e maluk ho kondisaun defisiénsia kontinua ezije ba governu no parlamentu atu ratifika konvensaun nasaun unida kona-ba direitu ema ho defisiénsia, tuir lei inan haktuir iha artigu 16 no 21.

Konvensaun ONU artigu 1 define ema ho defisiénsia hanesan fízika, psikososiál no intelektuál, maibé iha polítika Estadu liuliu iha programa MSSI kategoria sidadaun ho termu diskirminativu hanesan aleijadu no invalides.

Nune’e mós iha rezolusaun governu númeru 14/2012 kria polítika nasion’al ba promosaun no inkluzaun ba direitu ema ho defisiénsia.

Maib’e deskriminasaun hasoru ema ho defisiénsia kontinua maka’as, tanba rezultadu nota partisipasaun iha vida polítika hodi reprezenta povu iha parlamentu laiha, menus partisipasaun iha administrasun públika nu’udar funsionáriu Estadu, menus asesu ba informasaun, edukasaun no empregu.

“Ami husu ba governu bainhira maka atu ratifika konvensaun nasoen unida kona-ba direitu ema ho defisiénsia, ida ne’e maka ami nia hakarak”, hatete Jestór Treinadór Ra’es Hadomi Timor Oan, Silvia Soares, bainhira sai oradora iha seminaríu kona-ba defisiénsia iha administrasaun públika iha Timor-Leste ne’ebé organiza hosi KFP.

Nia akresenta loloos Estadu tenke uza termu ne’ebé bele hatuur direitu ema ho defisiénsia hanesan sidadaun ne’ebé ho kondisaun fíziku no intelektuál normál.

“Ami triste, tanba dala barak vagas sira ne’ebé loke hosi Governu iha kriteria hatete sehat jasmani no rohani (saudavel iha fizika no mentál), oinsá ho ami, ne’e impede ami atu hatama aplikasaun, tanba kria ona bareira ba ami”, subliña.

Iha sensu 2012 ema ho defisiénsia iha Timor-Leste hamutuk 48.242, sensu 2015 hamutuk 30.018 maibé tuir peskiza hosi demokrafia saúde identifika sidadaun TL hamutuk 52.356 maka notifika ho kondisaun defisiénsia.

Entretantu, lei-inan RDTL artigu 16 kona-ba universalidade no igualdade hanesan iha númeru 1 no 2 hatete 1) sidadaun hotu-hotu hanesan iha lei nia oin, no mós iha direitu no obrigasaun hanesan.

Alinea 2) labele halo diskriminasaun ba ema ida, tanba nia kulit, nia rasa, nia estadu sivíl, nia seksu, orijen étniku, nia lian, pozisaun sosiál eh ekonómiku, hanoin polítiku ka ideolojia, relijiaun, instrusaun eh nia kondisaun fízika eh mentál.

Enkuantu, artigu 21 hatete sidadaun ne’ebé iha defisiénsia iha númeru 1. Sidadaun ne’ebé iha defisiénsia fíziku eh mentál iha direitu no mós obrigasaun hanesan sidadaun sira seluk, maibé sira sei la hala’o knaar hirak ne’ebé sira labele hala’o, tanba de’it sira-nia defisiénsia. 2. Estadu, wainhira bele, promove protesaun ba sidadaun sira-ne’ebé iha defisiénsia, tuir lei haruka.

Maibé hosi konstisuisaun artigu 16 no 22, sidadaun ho defisiénsia sira konsidera seidauk espesifiku atu hatuur loloos direitu ema ho defisiénsia iha rai laran.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here