Shorgum. Foto/Google.

DILI, (TATOLI) – Sekretáriu Estadu Kooperativa (SEKOOP), Arsénio Pereira da Silva, hatete programa prioridade husi Sekretáriu Estadu nian maka foku liu ba kooperativa produsaun liuliu ba produtu shorgum iha tinan ne’e.

“Ne’e maka sai hanesan atividade prima, maibé ho programa shorgum ne’e integra ho buat barak liuliu iha kooperativa produsaun, tanba shorgum ne’e nia iha multi propózitu tanba ita kuda dala-ida nia bele kolleta dala-haat tanba ai-horis ne’e diferente ho batar, hare no seluk, maibé nia tipu hanesan ho tohu depois tesi tiha nia moris fali tan”, Arsénio afirma ohin iha Bebora.

Aleinde ne’e produtu refere bele integra ba haki’ak animál tanba sai ai-han ba sira, ba ema hotu nomós bele distribui ba iha indústria hanesan halo masin-midar.

Ho ida ne’e maka estratéjia SEKOOP nian sei halo plantasaun produtu ne’e iha fatin balu ne’ebé bolu sentru kooperativa integradu para seluk mós haree tuir no bele aprende iha fatin ne’e oinsá nia prosesu sira ne’e la’o.

SEKOOP nia planu asaun iha 2019 maka foku ba fatin sia ne’ebé sai hanesan sentru produsaun shorgum ne’ebé sei halo iha Suai, Manufahi, Ainaru, Manatutu, Lautein, Baukau, Oekusi no fatin rua seluk ne’ebé identifika ona.

“Iha fatin sira ne’ebé ami hili ona ne’e hanesan fatin halo produsaun barak kedan, mínimu ektare sanulu”, katak.

Tanba produtu ne’e iha variedade barak no variedade balu kuda para foti nia kain halo masin-midar, balu halo ai-saar maka nia merkadu sira ne’e iha hotu ona.

“Depois fatin sira ne’ebé ami identifika ona ne’e sai sentru kooperativa integradu ne’e bele sai ezemplu ba sira para sentru produsaun doméstika sira ne’e bele hatene ona para prodús iha sira-nia fatin depois lori mai sentru kooperativa integradu”.

Arsénio dehan iha Manufahi sei halo plantasaun shorgum ho ektare 23 ne’ebé preparadu ona no sei halo lansamentu ba kultivasaun produtu ne’e nomós iha Laklo ne’ebé mós fatin iha ona atu kuda.

Fatin sira ne’ebé identifika husi SEKOOP ne’e kada fatin ida mínimu ektare sanulu atu kuda shorgum.

“Maibé iha to’os-na’in sira barak komu hatene ona, agora daudaun husu fini para fahe diretamente ba sira-nia to’os depois de kolleita batar. Ne’e kuaze iha munisípiu hotu liuliu grupu kamponés ne’ebé tinan kotuk deklara prontu atu koopera ho Sekretáriu Estadu Kooperativa para tama iha kooperativa produsaun”.

Fini sira ne’e tuir Sekretáriu Estadu katak iha tinan dahuluk sei oferese husi SEKOOP ne’ebé kada ektare presiza kilógrama lima to’o hitu. Tanba produtu ne’e iha variedade maka iha fatin sira ne’ebé identifika ona ne’e sei kuda nia variedade (kuda shorgum oioin).

Tanba SEKOOP foku ba plantasaun shorgum ne’e maka buka mós merkadu bainhira iha produsaun no nia merkadu maka hanesan mérkadu doméstiku nia bainhira ema bele sosa hodi han no fó han mós ba animál sira nomós iha variedade ida ne’ebé kuda atu halo ba artezanatu.

“Merkadu ne’e bá iha Korea-du-Súl ne’ebé sira presiza haruka bá ne’e ai-saar tenke kontentór, entaun ne’e merkadu ida maka ne’e ona, mas agora, tenke prepara ema atu iha koñesimentu halo sai ai-saar. Ne’e sei tau iha programa para depois fó formasaun ba ita-nia ema sira iha rurál liuliu inan-feton sira mós alein iha serbisu seluk, ne’e sai hanesan sira-nia serbisu depois ne’e bele responde ona programa Governu nian katak tinan ida bele absorve traballadór rihun 60 bainhira materiál prima iha ona”.

http://www.tatoli.tl/2019/02/sek-prioritiza-kooperativa-produsaun/

Jornalista: Maria Auxiliadora

Editora: Rita Almeida  

HAKEREK NO HATÁN

Please enter your comment!
Please enter your name here