Sekretáriu Estadu Juventude no Desportu (SEJD), Nélio Isaac Sarmento. Imajen/António Gonçalves

DILI,(TATOLI) – Sekretáriu Estadu Juventude no Desportu (SEJD), Nélio Isaac Sarmento, afirma katak, iha tinan 2019 ne’e, SEJD prioritiza governasaun di’ak atu hasés funsionáriu sira hosi aktu korrupsaun.

“Ami haree liu ba governasaun di’ak, signifika atu hasés funsionáriu tomak iha aktu korrupsaun nian, tanba SEJD nia prioridade prinsipál ida maka infra-estrutura bázika iha área desporto”, hateten Sekretáriu Estadu Nélio Isaac Sarmento, ba jornalista sira, hafoin hasoru malu ho Primeiru-Ministru, Taur Matan Ruak, ohin, iha Palacio do Governo.

Nia hateten, SEJD iha razaun atu fó atensaun ba infra-estrutura bázika iha área desportu, tanba iha relasaun ho orsamentu, nune’e maka funsionáriu SEJD tenke proibe hodi halo korrupsaun.

“Primeiru-Ministru fó orientasaun di’ak mai ami katak ba oin tenke fó atensaun maka’as iha planeamentu no haree iha situasaun internál iha SEJD, atu labele difikulta ba ezekusaun programa no orsamentu ne’ebé iha”, tenis Nelio Isaac Sarmento.

SEJD iha programa prioridade haat iha 2019, dahuluk; governasaun di’ak, signfika SEJD tenke hasés funsionáriu tomak hosi aktu korrupsaun. Daruak; juventude no desortu, SEJD iha prioridade atu transforma karatér juventude hodi hatene sentidu ukun rasik-án, nune’e bele kontribui ba prosesu dezenvolvimentu nasionál. Da-toluk; programa desportu, signifika oinsa atu profesionaliza organizasaun desportivu sira liuhosi jestaun inklui organizasaun federasaun komité olímpiku,

Programa da-haat maka prestasaun profesionál, oinsa maka SEJD halo selesaun di’ak ba alteta nasionál sira atu lori sira ba kompete iha nivel internasionál.

Hosi programa prioridade hirak ne’e maka Primeiru-Ministru, Taur Matan Ruak, husu SEJD atu ezekuta programa ho di’ak tuir orsamentu ne’ebé iha.

Jornalista : Zezito Silva

Editór: Francisco Simões

 

HAKEREK NO HATÁN

Please enter your comment!
Please enter your name here