Bandeira Zelándia Foun ho Japaun. Imajen hosi google

DILI, (TATOLI) – Polísia Japaun no Zelándia Foun iha kompromisu atu kontinua apoia dezenvolve instituisaun Polísia Nasionál Timor-Leste (PNTL) liuliu ba dezenvolvimentu polisiamentu komunitáriu iha rai-laran.

Kompromisu ne’e hato’o hosi reprezenta polísia nasaun rua bainhira sai oradór iha semináriu nasionál polísiamentu komunitáriu ne’ebé hala’o durante loron rua, hahú ohin to’o aban iha salaun Ministériu Finansa Aitarak laran.

Ministru Defeza no Ministru Interiór Interinu, Filomeno Paixão, hatete semináriu ne’e atu tau prioridade governasaun da-ualu nomós hodi esplora tulun hosi doadór sira.

“Ita rona ona Nova Zelándia no tantu Japaun sira fó ajuda ne’ebé substansiál tebes, liuliu halo rezidénsia ba Ofisiál Polisiamentu Komunitária (OPS) to’o suku”, dehan ministru ba jornalista sira bainhira abertura ba semináriu nasionál, ohin.

Kondisaun infraestutura no ekipamentu ba OPS sira kontinua iha problema, tanba ne’e presiza nafatin tulun hosi doadór sira.

“Ita presiza apoia nafatin iha prevensaun hodi halo antisipasaun barak liu iha ne’eba para reforsa polísia komunitária”, dehan tan.

Entretantu Polísia Zelándia Foun halo aprezentasaun kona-ba prátika di’ak servisu polísiamentu komunitáriu iha sira ninia nasaun. Enkuantu Polísia Japaun aprezenta prátika di’ak sistema koban (sistema polísia komunitária iha Japaun).

Alende ne’e, iha mós aprezentasaun hosi Komandante Munisípiu Ainaru, Superintendente Polísia Justino Menezes, kona-ba fahe prátika di’ak polísia komunitária no buka fundu ba atividade komunitária.

Nune’e mós hosi parte Ministériu Administrasaun Estatal aprezenta kona-ba implementasaun lei suku ligadu ho servisu polísiamentu komunitária.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here