Prezidente KFP, Faustino Cardoso. Imajen António Goncalves

DILI, (TATOLI) – Komisaun Funsaun Públika (KFP), tersa, (5/3) sei hala’o semináriu ba ema ho defisiénsia iha Dili ho tema: “Enkoraza partisipasaun ema ho defisiénsia iha administrasaun públika”.

“Objetivu prinsipál hosi semináriu ne’e maka oinsá ita bele to’o iha entendementu hanesan kona-ba saida maka ita hatene nu’udar ema ho defisiénsia”, Prezidente KFP, Faustinho Cardoso, ba jornalista sira iha Palásiu Prezidente Nicolau Lobato, Bairru Pité, segunda ne’e, hafoin husu Prezidente Repúblika, Francisco Guterres Lú Olo, nia disponibilidade atu loke semináriu refere.

Nia esplika to’o ohin loron iha konseitu oi-oin de’it kona-ba ema ho defisiénsia no ida ne’e sai difikuldade ba instituisaun Estadu, liu-liu KFP atu oinsá bele hamosu polítika sira ne’ebé maka adekuadu hodi enkoraza partisipasaun plena (efetiva) hosi ema ho defisiénsia iha administrasaun públika nia laran.

Faustinho hatutan bazea ba rezultadu semináriu aban ne’e kuandu hetan ona definisaun ne’ebé ema hotu simu, KFP sei avansa peskiza ida atu halo levantamentu dadus kona-ba situasaun ema sira iha Funsaun Públika ne’ebé maka tama iha kategoria defisiénsia ne’e hamutuk hira no tipu ema ho defisiénsia saida de’it no grau saida de’it.

“Númeru ne’ebé klaru ita lahatene maibé dadus antigu ne’ebé iha ne’e ema ho defisiénsia ne’ebé iha administrasaun públika purvolta ema 78”, esplika.

Faustinho haklaken semináriu ne’e KFP define nu’udar atividade ba tinan ida no sai ona atividade rutina KFP nian, tanba hatúr ona iha planu estratéjiku.

Tuir loloos semináriu refere loke hosi Prezidente Repúblika maibé tanba Prezidente Repúblika okupadu ho asuntu seluk Estadu nian, entaun la disponível no prometidu atu halo abertura fali ba semináriu seluk ne’ebé organiza hosi KFP iha abril nia laran.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here