Premiadu Nobel ba Dame iha 1996, José Manuel Ramos Horta. Foto Fanpage FB Konsellu Imprensa

DÍLI, (TATOLI)-Ho esforsu no preparasaun maka’as iha tinan hirak ne’e nia laran fo garantia ida  fundamenta tebes ba rai no lider sira Organizasaun Sudeste Áziatiku (ASEAN-sigla Ingles) nian kona-ba adezaun Timor-Leste nian.

“La iha rai ida mak la simu Timor atu tama ASEAN, hothotu konkorda. Preokupasaun liliu mak ne’e, Timor iha kuadru, iha ema, tanba reuniaun ASEAN nian ne’e lubuk ida”, hateten   eis Prezidente Republika, José Ramos Horta,  ba jornalista sira, ohin, iha Salaun São José, Katedrál, Díli.

Tuir Horta nia haree katak, ASEAN nia éventu sira anualmente  maizmenus hamutuk 800 no bele liu tan no Timor bele partisipa ativamente hodi fo resposta  halo produsaun legál, lejislativa, mesmu la masima maibe Timor bele halo buat balun.

“Kritériu importante ba ASEAN sira mós sei haree ba paz i seguransa. Timor iha  nia esperiénsia, nia simplisidade, umildade, buka kolabora paz, seguransa iha rejiaun”, hateten Laureadu Nobel da Paz 1996.

Foin lalais ne’e, José Ramos Horta, halo visita ida ba Malázia ho Tailandia koalia mos ho embaixadór ASEAN nian sira hothotu fo apoiu maka’as adezaun Timor nian ba ASEAN.

Nia mos  fiar katak ho Primeru-Ministru (PM), Taur Matan Ruak, ne’ebé hetan mos apoiu masimu hosi lider rezistensia Kayrala Xanana Gusmão, sei lori duni prosesu adezaun ne’e. tanba figura Xanana mos iha influensia boot.

Horta mós akresenta, preparasaun Timor-Leste nian atu adere ba ASEAN la’ós responsabilidade Ministériu Negósiu Estranjeiru no Kooperasaun (MNEK) nian mesak,  maibé ministériu no entidade hotu.

“Balun hanoin adezaun ASEAN ne’e Ministériu Negósiu Estranjeiru nian. Lae, ne’e Governu tomak, la iha ministériu ida la iha responsabilidade atu prepara Timor nia adezaun”, hateten Ramos Horta.

Jornalista: Rafy Belo 

Editór: Francisco Simões

HAKEREK NO HATÁN

Please enter your comment!
Please enter your name here