Primeiru-Ministru, Taur Matan Ruak. Imajen Egas Cristovão

DILI, (TATOLI) – Primeiru-Ministru, Taur Matan Ruak, rekoñese feto sira nian kontribuisaun durante prosesu luta ba ukun rasik án.

“Mane sira kuandu difísil atu sai, feto sira bele halo kobertura. Ita bele dehan iha tinan 1990 sira maioria avontade liu halo servisu kuandu mane sira nia liberdade movimentu ne’e susar”, dehan eis-gerilleiru durante semináriu komemora loron veteranu ba daruak iha Sentru Konvensaun Dili, sábadu ne’e.

Rezultadu hosi kontribuisaun feto sira nian hanesan lori hahan no ekipamentu seluk ba ai-laran bainhira situasaun la permite mane sira atu ezerse knaar ne’e.

Ezemplu ida hosi partisipasaun feto nian maka, Xefe Governu hatete iha ninia livru ida ne’ebé hakerek hosi Mario nia versaun afirma feto sira iha Soibada ne’e ezemplu ida liu ba mane sira tauk ten.

“Tanba ne’e ita laiha duvida, ha’u hanoin OPMT komesa rejistu, maibé seidauk hotu, espera sei kontinua halo rejistu, barak liu memoria ne’e la hakerek ka dokumenta hodi hela iha sira nia hanoin”, afirma.

Entretantu, feto sira ne’ebé fó kontribuisaun maka’as ba prosesu luta maka Rosa Muki Bonaparte, fundadora OPMT-Organizasaun Popular da Mulher Timor; no Maria Goretti Joaquim, nu’udar pioneira ida iha frente klandestina no feto sira seluk.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here