Prezidente Repúblika, Francisco Guterres Lú Olo, Primeiru-Ministru, Taur Matan Ruak, Majór Jenerál F-FDTL, Lere Anan Timur, dada-lia iha Sentru Konvensaun Dili (CCD-sigla portugés), sabadu, (2/3/2019) bainhira partisipa semináriu nasionál ba komemorasaun loron veteranu ba daruak. Imajen Egas Cristovão

DILI, (TATOLI) – Primeiru-Ministru, Taur Matan Ruak, apresia ho rezultadu servisu hosi membru Governu da-ualu maske seidauk kompleta estrutura, tanba ne’e seidauk iha nesesidade atu halo remodelasaun.

“Primeiru-Ministru iha kompeténsia tomak halo, maibé primeiru lugar ha’u hakarak hatete ha’u nia ministru sira, vise no sekretariu Estadu sira servisu di’ak, apesar membru governu seidauk di’ak maibé servisu di’ak”, afirma Taur Matan Ruak hodi hatan ba jornalista sira kona-ba estrutura Governu seidauk kompleta iha Sentru Konvensaun Dili, ohin.

Tuir rezultadu servisu ne’e hatudu liuhosi ezekusaun orsamentu duodésimu no Orsamentu Jerál Estadu (OJE) 2018, Governasaun da-ualu ezekuta ho di’ak iha instituisaun Estadu maske estrutura la kompleta sei la afeta ba ezekusaun OJE 2019.

“Naturalmente todan liu maibé ami halo esforsu ho kbiit ne’ebé iha bele ezekuta orsamentu ne’e ho di’ak”, tenik Xefe Governu.

Tuir ezekutivu ne’e hatete membru Governu ne’ebé seidauk toma pose, sei kontinua halo diálogu ho Prezidente Repúblika hodi hetan solusaun.

Eis Prezidenti Repúblika ne’e akresenta remodelasaun governu bele akontese iha kualker tempu, maibé ba oras ne’e seidauk iha nesesidade.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here