Ministru Salvador Pires bainhira hato’o kondolénsia, iha ámbitu misa requiem ba matebian Etienne Munyazikwiye. Foto TATOLI: Rafy Belo

DILI, (TATOLI) – Governu Timor-Leste realiza misa ba matebian Etienne Munyazikwiye, sidadaun Itália, hodi fó bensaun iha Katedrál Dili, molok halo prosesu transladasaun ba nia moris fatin.

Hafoin misa, Ministru Obra Públika (MOP), Salvador Dos Reis Pires, hodi governu nia naran hato’o sentidu kondolénsia ba família enlutada.

“Governu hato’o sentida kondolénsia ba família no maluk hotu señor Etienne nian”, dezeja ministru ba família enlutada, perante jornalista sira iha Katedrál Maria Imaculada da Conceição, Vila verde, sábadu (2/3).

Ministru Salvador Pires haktuir matebian Etienne Munyazikwiye serbisu ho governu Timór, primeiru sai hanesan konsultór, ne’ebé nia papel mak halo supervizaun ba projetu konstrusaun sentru eletrika Hera no transmisaun, dezde 2010 no 2015 sai hanesan asesór ba MOP, liliu Diresaun Jerál Eletrisidade.

Família matebian ko’alia ho Ministru Salvador Pires hodi hato’o agradesimentu. Foto TATOLI: Rafy Belo

Iha 2018, matebian fila hikas mai Timór husi Itália no serbisu iha Gabinete Ministru, destakadu iha Diresaun Jerál Eletrisidade nian.

“Lori governu nia naran, lori ministériu nia naran, estadu, hato’o agradesimentu profundu ba Etienne Munyazikwiye nomós ba família, tanba husik hela ema ne’ebé sira hadomi hodi mai serbisu iha Timór”, agradese governante ne’e.

Matebian Etienne Munyazikwiye hakotu iis iha loron 20 fevereiru 2019.

Matebian nia kadaver sei halo transladasaun, ohin ba Itália. Tanba ne’e, molok halo transladasaun governu realiza misa matebian nian no depois misa hotu sei halo vizita dala ikus nian, iha Eletrisidade de Timor-Leste (EDTL).

Mate isin transporta husi Univem Funerál, husi Katedrál ba EDTL no husi EDTL ba Aeroportu Nicolau, Lobato, Komoro.

Misa matebian nian ne’e partisipa alende ministru, inklui mós diretór nasionál no funsionáriu sira EDTL nian nomós família no belun matebian Etienne Munyazikwiye nian.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here