Prezidente Repúblika, Francisco Guterres Lú Olo. Imajen Egas Cristovão

DILI, (TATOLI) – Prezidente Repúblika, Francisco Guterres Lú Olo, hateten importante harii lalais Konsellu Nasionál Kombatente Libertasaun Nasionál atu haree ba preokupasaun sira inklui kria fundu espesiál ida ho jestaun rasik atu selu pensaun no fó mós dalan ba Kombatente no Veteranu sira hetan rendementu rasik.

“Liuhusi dalan ida ne’e Estadu Timor-Leste dignifika di’ak liu-tan kombatente libertasaun nasionál”, Xefe Estadu ko’alia asuntu ne’e bainhira loke semináriu ne’ebé organiza hosi Sekretaria Estadu Antigu Kombatente Libertasaun Nasionál iha Sentru Konvensaun Dili (CDD-sigla portugés), sábadu ne’e hodi komemora Loron Nasionál Veteranu ba daruak.

Tuir nia veteranu sira nia vida tomak entrega ba luta libertasaun nasionál ninian, tanba ne’e sira iha direitu atu bele hetan netik moris ho dignidade iha tempu badak.

“Ho laran haksolok haree Oitavu Governu iha mós hanoin atu hamosu fundu espesiál ida. Ha’u saúda polítika ida ne’e hodi kria fundu espesiál refere”, afirms Lú Olo.

Nia haktuir novembru 2018, Primeiru-Ministru, Taur Matan Ruak, nomea ona membru ba Komisaun Instaladora hodi prepara ba primeiru Kongresu Nasionál Kombatente Libertasaun Nasionál ninian.

Membru Komisaun Instaladora maka Faustinho dos Santos, Renan Selak, Mário Nicolau dos Reis, Vidal de Jesus “Riak Leman”, Cesar dos Santos da Silva no Armando da Costa do Rosario “Midar”.

Iha fatin hanesan, Sekretáriu Estadu Antigu Kombatente Libertasaun Nasionál, Gil da Costa Monteiro “Oan Soru”, hateten nia seidauk bele ko’alia kona-ba montante fundu espesiál ba veteranu sira tanba seidauk tau osan ba ne’e.

“Ita foin halo planu. Iha planu ne’e ita presiza diskute konseitu sira hotu mai hosi dalan legál, dalan polítika no ekonómiku, nune’e bele ajusta hanoin para bainhira kria fundu ne’e ita iha ona esperansa katak fundu ne’e bele iha valór ba veteranu sira”, nia esplika.

Nia tenik veteranu hotu-hotu hetan ona atensaun maibé seidauk sufisiente ba sira nia moris própriu.

Kona-ba preparasaun komemorasaun Loron Nasionál Veteranu, Gil hatán, sira prepara iha semana ida nia laran hahú hosi misa agradesimentu iha Metinaru, semináriu to’o komemorasaun  aban (3/3/2019).

Nia dehan sira lori estrutura hosi sub rejiaun 12 iha Timor-Leste iha ne’ebé kada sub-rejiaun ne’e lori ema na’in 11, estrutura rejionál mai na’in lima-lima, estudante hosi universidade 11 iha Dili laran no kada universidade reprezenta ema na’in 40 hodi partisipa iha eventu ne’e.

Komemorasaun Loron Veteranu ba tinan ida ne’e ho tema “Haklaken Valór Rezisténsia ninian hodi prepara án ba dezenvolvimentu nasionál” ne’e gasta orsamentu hamutuk dollar rihun atus rua ($200,000).

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here