Komandante Operasaun Servisu Migrasaun, Inspetór Polísia Fortunato Fausto Guterres.

DILI, (TATOLI) – Servisu Migrasaun (SM) oras ne’e notifika ona sidadaun estranjeiru 100 resin hosi Indonézia, Xina no Filipina atu selu multa ba Estadu tanba uza vistu turista hodi hala’o knaar hanesan vendedór ambulante ne’ebé identifika durante inspesaun iha fulan-janeiru to’o fevereiru 2019.

Komandante Operasaun SM, Inspetór Polísia Fortunato Fausto Guterres, hatete tuir relatóriu, ema estranjeiru hirak ne’e maioria kbiit la’ek hodi halo servisu hanesan vendedór ambulante ne’ebé tama no sai bairru hodi faan sasan.

“Balun ita notifika ona para tenke sai hosi Timor no balun tama iha prosesu selu koima ba Estadu”, dehan Inspetór Polísia ba TATOLI iha ninia knaar fatin Ministériu Interiór Vilaverde, ohin.

Tuir nia maioria sidadaun Indonésia maka okupa númeru dahuluk, tuir Xina ho Filipina, tanba ne’e ba futuru, SM sei kontinua esforsu atu prevene no redús númeru traballadór estranjeiru ho ilegál iha rai-laran.

Meiu ba prevensaun ida maka servisu migrasaun kontinua kontakta adidu migrasaun Indonézia hodi informa asuntu ne’e atu konsidera, buka solusaun ba kestaun vistu ilegál.

Komandante ne’e haktuir liután balun kumpre selu koima, enkuantu sira ne’ebé la kumpre, SM kinta horiseik deporta ona sidadaun Indonésia nain rua no sabadu aban sei deporta tan nain lima.

Inspensaun ne’e bazea ba lei migrasasaun azilu 9/2003 no númeru 11/2017 hodi kontrolu sidadaun estranjeiru ne’ebé tama no sai teritóriu inklui aplika multa.

Definisaun valór montante hosi multa ne’e hakerek iha lei migrasaun azilu númeru 11/2017 iha artigu 143 no 144 ba pesoál no kompañia ne’ebé fó servisu ho valór hosi $250 to’o rihun ida resin.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here