Sekretáriu Estadu Ambiente (SEA), Demétrio do Amaral de Carvalho ho Operasaun Jerente Caltech, Rogerio Hornay, ko'alia hela kona-ba atividade empreza ne'e halo resiklajen ba kaixa ne’ebé sira rekolla. Foto/Mídia SEA.

DILI, (TATOLI) – Sekretáriu Estadu Ambiente (SEA), Demétrio do Amaral de Carvalho, vizita empreza Caltech ne’ebé ho esforsu rasik halo tratamentu ba lixu ka resiklajen ba kaixa mamuk, botir, ákua nomós sunu sasán ospitalár ka medical waste.

“Sira iha intervesaun balun hodi halo resiklajen ba bee, kaixa nomós ákua nia botir sira. Hatene katak ita presiza duni setór privadu hodi partisipa hodi mellora ita-nia ambiente liuliu halo resiklajen, tanba ne’e ohin ami halo vizita hodi haree esforsu balu ne’ebé sira halo ho sira-nia rekursu rasik”, Demétrio afirma ohin hafoin vizita empreza ne’e iha Beduku.

Operasaun Jerente Caltech, Rogerio Hornay, esplika funsionamentu press machine ne’ebé halo kaixa mamuk sira kesi hamutuk tiha ba Sekretáriu Estadu Ambiente (SEA), Demétrio do Amaral de Carvalho ho ekipa. Foto/Mídia SEA.

Aleinde ne’e haree mós incinerator ka mákina sunu ne’ebé durante ne’e uza hodi halo tratamentu ba lixu ospitalár nian ho temperatura besik 1000 grau Celsius.

Operasaun Jerente Caltech, Rogerio Hornay, hatete empreza ne’e halo resilkajen ba besi tuan ka aat (scrab metal) ho kaixa, maibé besi aat ne’e bainhira iha kontentór barak ona entaun fó ba kompañia ida esporta.

“Ákua ami foti tau hela iha ne’e, agora ita seidauk halo buat ida no rai de’it, mas planu ba futuru ami buka tuir mákina balu para uza plástiku ne’e sai fali buat ida ita bele utiliza, mas ofisialmente seidauk bele, karik iha fulan ida ka rua mákina ne’e kuandu to’o mai sei konvida fali Sekretáriu Ambiente oinsá para bele halo resiklajen ne’e”.

Antes ne’e botir ákua empreza nia bainhira barak haruka ba kompañia ida ne’ebé halo atividade esporta ka haruka sasán bá li’ur, maibé daudaun ne’e paradu, tanba ne’e empreza foti no tau hela iha sira-nia fatin.

Sobre akúa mamuk sira ne’e empreza rekolla husi sira-nia kliente rasik hanesan Venture Hotel, forsa Amérika sira-nian (US Navy), Defence Cooperation Programa (DCP) Austrália no restaurante Auberginie iha Metiaut.

Enkuantu atu foti mós ákua sira ne’e iha fatin seluk, Rogerio hatete aban-bainrua bele, tanba buat hotu presiza kustu no bainhira ema seluk hakarak fó ba empreza ne’e sira bele tau iha sira-nia fatin.

“Tanba haree ba parte business nian to’o agora seidauk iha folin, karik futuru iha folin ona ita bele rekolla husi fatin seluk”.

Kona-ba lixu husi ospitál ne’e empreza foti husi klínika rua mak Stamford no Marie Stopes ne’ebé foti tinan ida dala-ida ka rua tanba volume ladún boot.

“Baibain sira tau hamutuk kuandu volume natoon ona sira bolu ami bá foti no destroe iha incinerator ne’ebé sunu aimoruk liu prazu sira ne’e. Ita set up nia manas ne’e 900 ba leten para hodi harahun tiha aimoruk sira ne’e despois ahi-kadesan ne’e lori bá Tibar”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here