Sekretáriu Estadu Ambiente (SEA), Demétrio do Amaral de Carvalho ho ekipa bainhira observa direta tanke fakar óleu rezíduo iha Tibar. Foto/Mídia SEA.

TIBAR, (TATOLI) – Sekretáriu Estadu Ambiente (SEA), Demétrio do Amaral de Carvalho, hatete presiza tan espasu atubele akomoda óleu fo’er iha Tibar tanba daudaun ne’e tanke lima ne’ebé harii no rua iha rai nakonu hotu ona.

Sekretáriu Estadu Ambiente (SEA), Demétrio do Amaral de Carvalho ko’alia ho seguransa iha fatin óleu rezíduo, Alberto Soares Freitas da Cruz. Foto/Mídia SEA.

“Situasaun ne’e presiza duni ita-nia intervensaun. Ita espera iha rekursu ruma atubele mellora tratamentu ba rezíduo sira ne’e”, Demétrio afirma ohin bainhira halo inspesaun direta iha fatin halibur óleu rezíduo nian iha Tibar.

Sekretáriu Estadu ne’e dehan tanke lima ne’e hamutuk hotu bele akomoda óleu rezíduo litru rihun 600. Infelizmente, tinan rua kotuk produsaun óleu fo’er maka’as tebes tanba ita iha sentru eletrisidade rua ne’ebé prodús ho kuantidade boot, tanba dalaruma foti dala-ida de’it husi Hera ho truck litru 5000 nian tolu, pur tantu kuaze litru 15.000 maka halibur kada períodu hodi rekolla óleu fo’er husi sentrál Hera.

Tanba fatin ba óleu fo’er ne’ebé nakonu ona, eis deputadu ne’e dehan urjente no se iha rekursu halo kedan intervensaun, halo tan tanke konjeladór boot rua ka tolu hodi bele rezolve problema.

Enterantu iha empreza ida ne’ebé Sestu Governu kontrata atu halo resiklajen ba óleu fo’er ne’e ba óleu ne’ebé bele utiliza filafali, maibé teknolojia ne’ebé empreza ne’e lori mai seidauk apropriadu atu halo tratamentu ba óleu rezídou ne’e.

“Kontratu empreza ne’e karik expire ona, uluk Sestu Governu maka halo kontratu ho empreza ne’e no ami halo revizaun semana ne’e se empreza ne’e laiha kapasidade tenke buka mekanizmu seluk”, katak.

Seguransa iha fatin óleu rezíduo, Alberto Soares Freitas da Cruz, hatete bainhira husi Governu no kompañia lori óleu, sira simu no fakar ba tanke, mas bainhira lori hamutuk ho bee labele hatama no buka fatin hodi ke’e-rai atu hakoi.

Kona-ba mákina resiklajen ne’ebé daudaun tau iha fatin ne’e, Alberto katak empreza halo resiklajen maibé lasai no mákina paradu tinan ida ona.

Tanba óleu rai de’it iha fatin ne’e no lahalo resiklajen maka bainhira udan mai bele lori óleu ne’e tama to’o tasi no fó impaktu mós ba sasán no animál sira ne’ebé besik fatin ne’e.

“Ami fó atensaun ba Ambiente, sira mai fiskaliza beibeik buat ne’e. Ami hakarak tanke lima ne’ebé nakonu ne’e tenke buka meiu prepara fatin tanba foti tan mai agora atu tau iha ne’ebé, se fatin laiha, entaun so’e ba li’ur impaktu boot ba povu tanba ema nia animál ou bee lori ba to’o tasi ne’e ita kona”, nia dehan.

Tanba ne’e presiza tan tanke rua ka tolu atu tau iha fatin ne’e, nune’e bele fakar óleu fo’er sira ba laran.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here