Uma Fukun Parlamentu Nasionál. Imajen/Espesiál

DILI (TATOLI) – II Vise Prezidente Parlamentu Nasionál, Luís Roberto da Silva, nu’udar membru V lejislatura, husu atu iha komemorasaun loron nasionál veteranu iha loron 3 marsu, veteranu sira bele nafatin sólidu.

“Nu’udar membru Parlamentu Nasionál (PN) fó onra no dignifika nafatin sira nia luta durante ne’e. Rekomenda ba veteranu sira ne’ebé mak sei iha hodi bele sólidu nafatin no koopera hamutuk nafatin hodi harii ita nia nasaun ne’e ba futuru ne’ebé di’ak”, tenik ba jornalista sira iha PN, ohin.

Nune’e mós deputadu bankada KHUNTO ne’e nafatin fó onra ba veteranu sira ne’ebé lakon sira nia vida hodi liberta povu no nasaun ida ne’e no husu ba sira ne’ebé sei iha atu nafatin kontribui ba dezenvolvimentu.

“Nu’udar jerasaun foun, husu liu-liu ba aman veteranu sira ne’ebé sei iha atu koopera hamutuk iha aspeitu hotu-hotu para bele hametin estabilidade iha ita nia rai-laran”, katak.

Entretantu, tuir portál ofisiál governu hahú husi loron 1 to’o loron 3 marsu sei komemora loron nasionál veteranu sira nian ho forma atu fó onra ba kontribuisaun husi martir sira, kombatente no veteranu ne’ebé mak luta ba independénsia Repúblika Demokrátika Timor-Leste (RDTL).

Selebrasaun ne’e sei hahú tuku 9.00 loron 1 marsu, ho misa iha jardin eroi iha Metinaru. Iha loron 2 fulan-marsu, entre 8.00 no 17.30 otl, sei hala’o semináriu ida iha Sentru Konvensaun Dili (CCD-sigla portugés).

Iha loron 3 fulan-marsu, selebrasaun loron nasionál ba veteranu sira, sei hahú iha Palásiu Governu ho isár bandeira FALINTIL no RDTL, diskursu no marsa husi veteranu to’o CCD, ne’ebé mak sei realiza mós almosu konfraternizasaun, no dansa ho múzika ne’ebé toka husi veteranu sira.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here